SUPERBALITA CEBU

Super Blowout: Kalampusan ni 'Carrot Queen'

SALAMAT: Mao kini ang mga pulong nga gilitok ni Erwin Loregas niining duha ka mga babaye nga naa sa iyang isig ka kilid nga nahimo niya nga inspirasyon ug kaabag sa iyang pagtungha. Ang babaye sa iyang wala (nag-stripe og itom) mao ang iyang inahan nga si Socorro Loregas. Samtang ang babaye sa iyang tuo mao si Jeanie Dela Cerna, ang iyang amo ug maoy tag-iya sa tindahan sa mga utanon nga gibantayan ni Erwin. (Tampo)

ANG tawo nga puno sa determinasyon bisan kon unsa pa ang mga babag sa kinabuhi molampos gayud inubanan sa kakugi ug sa giya sa Ginuo.

Sama ni Erwin Villacorta Loregas, bisan sa mga pagsuway sa kinabuhi, nakab-ot ang iyang damgo nga makatapos sa kolehiyo pinaagi sa kaugalingong paningkamot uban sa tabang sa mga tawo nga nagmahal niya.

Niadtong Oktubre 26, 2019, nagbunga ang iyang paningkamot dihang siya ni-graduate ug nipaso sa stage pagdawat sa iyang diploma sa Bachelor of Arts in Communication sa University of San Jose-Recoletos (USJ-R).

Nahimo nga saksi sa kalamposan sa 28 anyos nga binabaye ang iyang inahan nga si Socorro Loregas ug ang iyang amo nga si Jeani Dela Cerna nga nakatabang sa iyang paghuman sa kolehiyo.

Si Erwin naninda og mga utanon, labing daghan kay carrots, sa Carbon Public Market. Kini maoy negosyo ni Jeani ug sa iyang bana nga si Delfin Dela Cerna Jr.

Nahimo nga epektibo nga manindahay si Erwin ug may mga suki na kini nga mga mamalitay.

Si Erwin, lumad nga taga Butuan, Agusan del Norte. Siya ang ikatulo sa lima ka mga igsuon sila si: Candelario, Eric, Jasson ug Jessa Mae. Ang ilang amahan namatay niadtong 2012.

Niadtong 2008 pa siya naabot sa Sugbo diin kaabag siya sa iyang iyaan sa pagpaninda sa Carbon ug sa mga bulohaton sa balay.

Bugti niini, gipatungha siya og usa ka semester sa iyang iyaan sa Cebu Institute of Technology-University.

Niadtong 2014, nakadawat og text si Erwin gikan sa iyang amo nga nagdapit niya nga adto manarbaho sa sa ilaha. Ang sweldo nga nadawat niya igo ra niya gilaag-laag.

Niabot ang panahon nakahukom si Erwin nga motutok na sa iyang pag-eskwela hinungdan nga niadtong 2015 nibalhin siya og tungha sa USJ-R ug nikuha og kursong Bachelor of Arts in Communication.

Sa gabii, maninda siya ug sa adlawan, siya moeskwela.

Matug siya og kadiyot sa di pa moeskwela ug usahay adto siya matug sa eskwelahan.

Kon naa sila’y group project, ang iyang mga klasmeyt ang mo-adjust ug moadto sa ilang tindahan sa Carbon. Usahay moapil siya og praktis balig usa ka oras, ug mobalik dayon siya sa tindahan inig human.

“Laban ra jud kaayo ko ato kay maglisod kog bahin sa akong time kay kinahanglan pud ko mag-atiman sa akong mga baligya kay mao mana akong source of income,” matod ni Erwin.

Siya mapasalamaton sa mga tawo nga nakatabang niya sa iyang nakab-ot nga kalamposan sa pagtungha sa kolehiyo.

“Una sa tanan magpasalamat ko sa atong Labaw nga Makagagahum kay og dili tungod Niya, wala ko Niya gitagaan og saktong dalan ug panghunahuna di ko maka-graduate. Sa akong mama despite nga wala mohatag nako financially pero, naa kanunay gahatag og advice nako kung unsay matarong. Sa akong amo Ate Jeani ug Kuya Jojo kay og dili tungod nila dili nako makab-ot ang akong pangandoy nga makalampos sa koleheyo. Sa akong mga friends nga kanunay nagahatag og positive advice para dili ko mo give up ug sa akong mga kaliwat nga ni believe sa akong kakayahan.” (SCG)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph