ANG barangay mao ang labing gamay nga unit sa local government. Giharian kini sa mga barangay kapitan. Kon adunahan ang barangay ug mabuhi sa kaugalingon niining pundo, sama sa Barangay Lahug kaniadto, di kini magawngan. Bitaw, ang kapitan maoy in-charge sa iyang gamay nga gingharian. Iyang seguruon nga ang mga batakang serbisyo mahatag sa iyang constituents.
Si San Antonio Barangay Captain Jojo Abcede akong kauban kaniadto sa Sun.Star ug ako usab nga kumpare. Sama nako, naa sab ni siyay idealism kabahin sa governance. Nalipay gani ko nga siya maoy midaug.
Tuod man, pipila ka mga buwan ang nakalabay human siya niasumer, nahawan og kalit ang mga sidewalk ubos sa iyang jurisdiction. Nagtuo kong gihawanan kini sa City Hall. Apan dihang nagkita mi ni pareng Jojo, nisulti siya nako nga siya ang nanghawan. Iyang gibalik ang sidewalk ngadto sa mga tawo.
Bisan gani ang kadtong mga typist sa atbang sa University of San Carlos (USC) naapil sa paghawan. Iya untang ibutang og mas maayong dapit nga di makababag ang mga typist, apan wa usay niduol kaniya. Andam unta siyang moabag kanila.
Kahibawo ko nga di sayon ang iyang pagbuhat niini tungod kay naligsan niya ang mga nanginabuhi sa sidewalk. Apan iya usab nga gihuna-huna ang kinabag-an sa publiko nga makabenepisyo sa hawan nga agianan.
POLITICAL WILL
Gipakita ni pareng Jojo ang poltical will. Kana bang bisan dunay maligsan nga panginabuhi sa pipila, iyang gihuna-huna ang kaayuhan sa kinabag-an. Wa usab magpasabot nga pasagdan na lang usab ang nawad-an sa ilang panginabuhi. Duna man gyud nay win-win solution.
Ingon pang Jojo, nagpatuman siyag discipline zone, sama sa gibuhat sa City Hall sa Osmeña blvd. Maayo kaayo ni nga lakang nga iyang gihimo. Hinaut nga sundon ni sa ubang mga barangay kapitan. Mapatuman ang kahapsay sa tagsa ka mga dapit mas daghan ang malipay. Agi usab ni og pag-abag sa LGU.
NO STOPPING
Kaniadtong magsige pa ko og tungas sa Busay, usa sa among mga problema kining mga PUJ nga mohunong og kalit sa atubangan samtang nagsubida. Kon magsubida ka unya kalitan ka og babag, mawala ang imong momentum sa pagsaka.
Ang nakapait, daghan ang manghunong anha sa no stopping sign. Kanang lugar sa dan nga di pahunongan. Bisan diha sa karsada sugod sa Marco Polo ngadto sa barangay hall, naay mga portion sa no stopping sign nga hunongan, sama sa blind curve unahan gamay sa usa ka bakery.
Maayo unta kon mabadlong ni sa akong higalang si CCTO operations chief Francisco “Isko” Ouano. Bisan asa kang lugara, ang labing kuyaw nga parkingan sa sakyanan ang blind curves. Di na huwaton nga dunay aksidenteng mahitabo.