PIPILA sa mga bigating pelikulang Tagalog karon ang dili kaayo maayo og kita sa takilya bisan pa sa nindot nga mga review.
Sama sa “Isa Pa With Feelings” ni Maine Mendoza ug ang “Unforgettable” ni Sarah Geronimo.
Siguro nag-expect lang tag dako sa pelikula ni Maine Mendoza tungod sa Alden Richards-Kathryn Bernardo hit movie nga “Hello Love Goodbye.”
Sa kaso usab ni Sarah Geronimo mas feel tingali sa iyang mga supporter nga makita ang soon-to-be-bride nga may kapartner sa pelikula.
Pero wala sad kaayo mokita ang horror movie nilang Beauty Gonzales, Dennis Trillo ug Raymond Bagatsing nga “Hellcome home”.
Unsa kahay nahitabo sa atong mga moviegoer? Sobra na ka pilian sa mga salida o nagtigom lang para sa umaabot nga Kapaskuhan? Basin pod og nangandam para sa Metro Manila Film Festival?
Pareho sab kaha niini ang mahitabo sa pelikulang “The Annulment” nilang Lovi Poe ug Joem Bascon?
Samtang may hugon-hugon nga balikan ni Lovi ang iyang first love nga singing ug mag-release kini og album gikan sa Viva records.
Ang “The Annulment” sa Regal films ug sa direksyon ni Mac Alejandre showing na sa mga sinehan nga usa ka sexy drama diin komportable ang aktres. Suportado sad si Lovi sa iyang uyab nga dili seloso, ay’g saba!
Siguradong human sa bakasyon ni Kathryn Bernardo ug Daniel Padilla balik-bisi na sila sa mga bag-ong proyekto.
May teleserye nga gi-andam ang Dreamscape production sa KathNiel nga siguradong karon pa lang excited na ang fans.
Type usab ni Kathryn mobuhat og horror movie. Ang una ug katapusan niyang medyo horror ang “Pagpag” nila ni Daniel Padilla, ay’g saba!