NAHIMUOT ko dihang una ko nga nakadungog niining balaudnon nga nagdili sa mga bata nga wa pay 13 anyos nga makagamit og Facebook ug ubang mga social media platforms.
Saun nga subay sa mga lagda sa Facebook, di na man gyud pwede makahimog FB account ang wala pay 13 anyos. Ang nakaapan lang, sweto na man kaayo ang mga bata karon. Pila ra may paghimog account nga di tinuod ang edad?
Ibutang nato nga maayo man tuod ang katuyoan niining House Bill No. 5307 nga may titulo “Social Media Regulation and Protection Act of 2019 nga gisang-at ni Laguna 1st District Rep. Danilo Ramon Fernandez.
Gusto ni Fernandez nga kinahanglang ang mga social media companies nga nag-operate sa Pilipinas mopalig-on sa ilang plataporma aron dili makasulod ang mga wa pay 13 anyos.
Wa tingaley nakahunghong ni Kong. Fernandez nga di pwede maghimog Facebook account ang moangkon nga wa pa siyay 13 anyos. Ambot nganong wa kini masusi daan sa kongresista.
Alang kanako, usa lang kini sa naka-apan nga akong nalantaw sa usa ka balaudnon nga gimugnag magbabalaud nga wala masweto sa teknolohiya karon. Lupig gyud sa mga otso o diyes anyos.
Naa pa sa elementarya pa intawon ang akong kamanghuran pipila na ka tuig nga milabay nga nakakita ko kaniya nga duna nay FB account bisan pa man nga di unta kini pwede. Kana kon matinud-anon sila inig himog FB account.
Apan marukoy na man kining mga bata karon. Di man mo-register nga below 13 years old. Moingon man nga 13 anyos o mas maguwang pa.
Mao nga daghan ang mahibulong karon nga bisan og 13 anyos o 14 anyos pa ang bata, ang edad sa iyang FB account moabot na og 16 o gani 20 anyos. Ngano? Kay dihang otso o 10 anyos pa, nag-register na man sa FB nga siya 13 anyos na.
Karon, unsaon man kini pagbantay sa balaudnon ni Kong. Fernandez? Iapil sa balaud nga mangayo una og birth certificate kon maghimog FB account?
Paita sa gurs nga nga kongresista. Akong gi-Google ang iyang edad apan duna hinuon koy nadiskubrehan. Ang account sa website sa Santa Rosa city nga gi-link ang iyang ngalan na-suspended na. Gurs gyud. Pangitag mga adviser nga mga batan-on kong.
Ang ako lang matambag gyud niining atong mga magbabalaod karon, tun-i unsa kon giunsa paggamit sa mga bata karon ang social media. Iresponsable ba silang tanan?
Ang akong ma-share mao ang response sa usa ka titser niining mga bata nga duna nay social media accounts. Iya hinuong gipahimog usa ka FB group ang mga bata ug apil sab siya sa ilang chat diin ilang mahisgutan ang mga assignments ug mga kalihokan sa klase.
Hinuon, batan-on pa sab ang maong titser ug imbes iyang gidili, gisakyan niya alang sa maayong direksyon ang mga bata.
Ang mga gurs nga magbabalod angay na gyud makat-on sa mga bata. (@anol_cebu sa Twitter)