BISAN tuod og gi-aksiyonan na ni Carcar City Mayor Mercy Apura ang mga binoang sa pipila ka mga namaligyaay og lechon sulod sa merkado sa maong dakbayan pinaagi sa pagpasira sa upat ka stalls, lisud nang ibalik ang nagusbat nga imahin sa lami nga lechon. Mikatap ug nabaniog na og maayo sa social media ug mainstream media ang binoang sa pipila ka mga namaligya og lechon sulod sa merkado.
Niadtong Miyerkukes, mismo si Gov. Gwen Garcia nibisita sa Carcar City ug mipakita nga mikaon og lechon aron lang pagmatuod nga presko na ang gibaligya, dili na pan-os ug baho. Aw, natural kinsa may mopakaon og bahaw nga lechon sa gobernadora unya atubangan pa sa mga photographer ug sa publiko ug sa mga opisyal mismo sa maong dakbayan. Pang-publisidad lang tong gihimo ni Gwen.
Sigurado gyud kaha nga walay nay binoang sa mga manindahay diha? Dili na kaha pugson anang nga namaligya ang ilang mga kustomer nga mopalit sa pinutos nang daan unya bahaw ug pan-os na diay? Pipila ka oras lang manimaho na dayon. Wa na kahay sabaw init nga gibutang ilawom sa ilang stalls aron maoy ilapwa sa ilang lechon aron lab-as nga tan-awon sa mga kustomer?
Gipasigarbo baya ni Mayor Mercedita Apura ang ilang lechon nga usa sa local delicacies nga angay anhaon sa mga bisita. Labi na ning nagsingabot sa ilang kapistahan sa sunod semana. Apan daghan na ang nadismaya gumikan sa mga binoang. Ang pagpasira niadtong mga nagbinoang, dili pa igo nga silot kanila. Gikinahanglan gyud nga close monitoring sa mga opisyal sa market administration.
Apil baya pod sa mabasol nato mao kanang mga market officials. Nganong wala nila kini madeparahe sa wala pa kini mobuto sa social media? Pagkadugay na diay ning maong binoang. Karon nasuta nga wala diay mayor’s permit ug sanitary permit ang maong mga stall. Kon nagtamud pa sila sa ilang mga trabaho, dugay na unta kining naaksiyon ug posibleng masalbar pa ang imahin sa lechon sa Carcar. Kadtong mga nabiktima sa ilang mga binoang mo-ingon na lang nga ‘mag-usab pay layog’. (bobbygnalzaro@gmail.com)