DUNAY himuong diversion nga karsada gikan sa Barangay Guadalupe padung sa Barangay Lahug. Gastuhan kini og binilyon ka pesos sa kagamhanan.
Maanindot man tuod ang plano kay makapaluag kini sa mga karsada, sama sa V. Rama, M. Velez ug Escario kay ang ubang mga sakyanan di na kinahanglang moagi latas sa mao nga mga dan sa ilang pag-adto sa Lahug.
Apan sa matag karsada nga buksan, kon di kini ubanan sa pagpalapad diin kini mosangko, mopasamot kini sa kahimtang sa trapiko. Mahimo kining chokepoint sa madugay o sa madali. Sama sa mga flyover nga sa hamubong panahon nakapaluag sa dagan sa trapiko.
Kon mabara ang dagan sa trapiko sa may eskina sa Sudlon sa Lahug kay nahimo kining chokepoint, dako ang kahigayunan nga ang proyekto sa Guadalupe-Lahug mahimo sab nga ingon niana.
Mahimo usab nga ehemplo sa tapak tapak nga solusyon sa trapiko, sama sa pag-ayo sa mga karsada nga tapak tapak lang.
Kanus-a man kaha mahitabo nga dunay traffic master plan nga pang long term? Kana bang ang pagpatuman alang sa mosunod nga 50 ka mga tuig base sa projection o bana-bana sa pagtubo sa populasyon ug ekonomiya.
Sa pagkakaron man gud, ang kagamhanan kutob lang sa tapak tapak nga paghatag og solusyon sa problema. Reaksyunaryo ang kagamhanan. Anha ra mangitag solusyon kon dunay problemang motumaw. Anha ra molihok kon naa nang suliran.
Di usab angay nga kanunay himuon nga katarungan ang kakuwang sa pundo. Kon nahimo sa ubang mga nasod ang pagpangtukod og mga imprastraktura bisan mas kabos pa sila itandi sa Pilipinas, nganong di man mahimo sa mga Pinoy?
Kini tungod kay mas unahon man gud ang paghuna-huna sa komisyon sa pagahimuong proyekto. Unya naa pa nang mag-away kon pilay ilang bahin. Mao na nga budget sa proyekto, labing minos 30 porsyento mahiadto sa lainlaing bulsa.