TULO ka mga motorsiklo ug usa ka multicab ang gisakmit sa kapulisan sa Dakbayan sa Talisay, pasado alas 12 Sabado sa kaadlawon, Nobiyembre 16, sa Cebu South Coastal Road (CSCR) sa Barangay Cansojong, Dakbayan sa Talisay.
Kini atol sa pagresponde sa gireklamo nga pagsiaw sa drag racing sa maong dapit.
Matod ni Police Major Gerald Ace Pelare, base sa nipadangat sa reklamo, nga pasado alas 11 pa lang Biyernes sa gabii, Nobiyembre 15, giingong nagsugod sa drag racing ang kalalakin-an.
Reklamo sa mga residente sa lugar ang kasaba sa ilang motor ug mga tawo mismo.
Daling niresponde ang Talisay Police, matod ni Pelare apan, nag-iyahay og ikyas ang mga anaa sa lugar.
Hinungdan nga way bisan usa kanila ang nasikop.
Apan tungod sa pagdali-dali aron di madakpan sa mga pulis, tulo ka mga motorsiklo ug usa ka multicab nabiyaan sa lugar. Nasakmit ingon man ang P170 nga salapi nga gituohan nga parte sa gipusta sa mga nisibat.
Si Pelare niingon nga padayon ang ilang pagmonitor niining klase sa kalihukan nga nakamugna og kasamok sa mga lumolupyo sa lugar.
Gawas pa niana, nagbutang sab kini og peligro ngadto sa mga drayber sa motorsiklo nga ilang gipalumba ug sa mga motorista nga mag-agian sa maong dan.
Gitug-an ni Pelare nga ilang gi-trace karon kon si kinsa ang mga tag-iya sa maong mga sakyanan alang na sa pagpasaka sa kaso nga kalapasan sa mga balaud sa Republic Act 1602 kun illegal gambling ug Republic Act 4136 kun Land Transportation and Traffic Rules.
“We would like, once again to warn, that we are serious to stop drag racing because it is really, it is a hazard, a nuisance kay saba, then there are lots of violations of laws in drag race,” pasabot ni Pelare sa phone interview sa Superbalita Cebu.