BAGUIO

Luzano: Build-build-build program ni Digong… palpak kano?

Karit ken Kayetket



HAAYY biag-Pinoy. Ti la adda ditan a kontrobersiya a sumsumngaw. Arigna ngay tay simngaw a buyok ti nasobraanna ti nangan iti kamote ken mais sana pinasarunuan iti sangagantas a mani. Pwe! Ta ania manen dayta baro a pasngaw, pards? Tay ngay impug-aw ti ngangaw ti maysa a senador a nagkuna a “pimmalpak” kano met ti Build Build Build Program ni President Duterte.

Sus Maryunes! Kasano a napasamak daytoy? Ala, intay man busisien ti pug-awda tapno di manen mayalis ti alipuspos ni Juan dela Cruz. Ngem sakbay iti dayta, intay met sigiden biit dagiti sumangka-kontrobersiya a paspasamak iti kallabes:

***

Adda nagkuna itay nabiit a nakarkaron sa kano ti panagdildila ni DFA Secretary Locsin ngem iti dila kano ni Pres. Duterte. Ania? Kasano? Adda kano nagreklamo a reporter iti kinarasaw nga agsasao wenno sumungsungbat ti sekretaryo. Kasla kano naibaba iti dignidad dagiti nasaktan a reporters. Ala, ditayon sukayen pay ti puon ken gapu ti kontrobersiya. Ti sintruentayo laengen ket ti rumbeng wenno maiparbeng a tignay dagiti nangangato nga opisyales ti gobyerno. Di rumbeng kadakuada ti kinapangas, kinangato ken mangpasakit iti rikna dagiti umili nangruna kadagiti addaan parikut ken agpatpatulong. Dika tagibassiten ti kabaelan ken kinatao ti kasangsangom. Ngamin iti kammalim...inramanmo ti dagupen ti gobyerno a nangted kenka iti akem.

Natural, no nasaktan ti masa... agkayamkam dayta agingga iti nangipatugaw kenka, saan aya? Haayy biag... malagipko manen ti nakuna idi daydi lolok: no maysaka a ngilaw a bimmatay iti bukot ti nuang, saanna a kayat a sawen a mas nataytayagkan ngem iti nagdissuam. No kutoka koma, saanna a kaibatogan a mas nataytayoken ti puestom ngem iti pagbibiagam nga ulo ti biktimam. Isu nga idi inasawana daydi lolak...inkarigatanna piman ti nangilimed iti makabekkel nga ungetna iti sango ti “batya” ken “plansaan.” In short...”that’s love, men!”

***

Oplan Tokhang ng Duterte Administration...kayat ni Vice Pres. Leni Robredo a punasenen. Baro a temple, saan kadi, pards? No intay lagipen, adu dagiti nagbiag iti illegal a droga ti nabasnotan gapu iti tokhang. Adu dagiti naipisuk iti pagbaludan. Adda dagiti naaresto ngem naikkan iti gundaway nga agbalbaliw babaen kadagiti rehab-center. Adu met dagiti naipatli gapu ta limmaban. Gapu iti pammapatay...nagbunga daytoy iti negatibo a konsepto. Adda dagiti grupo ti nangkondena gapu kadagiti atap wenno suspetsa.

Kunada a nalabsing kano ti karbengan dagiti napapatay para iti umno a hustisya. Dayta ti gapuna no apay nga idi iniwat ni VP Leni ti akem a co-chairman iti ICAD wenno nagbalinen a Anti Drug-Czar puntiryana a maisardengen ti pammapatay. Banag a medyo nakagiingan dagiti kapulisan nangruna iti benneg ti PDEA.

Narigat met ngamin nga itaya lattan dagiti otoridad ti uloda no lumaban dagiti suspects iti illegal a droga. Natural lang nga agdepensa dagiti maseknan a pwersa ket mabalin a mangiresulta iti panagnakanak ti dara. Ngem iti benneg ti Palasyo... agtamedda no aniaman kano ti plano nga iwayat ni VP Leni. Saan kano a kumontra ti Malakanyang.

***

Nairakurak itay nabiit a nagpatayab kano iti “flare” dagiti Tsino iti maysa a teritoryo a sinakupda a sakup ti Pilipinas. Napasamak ti ennem a daras sipud Enero ita a tawen a panagpatayabda iti “flare” bayat ti panagampayag dagiti eroplano ti AFP kadagita a disso. Natural, makaalarma daytoy, kuna dagiti opisyales ti armada ngamin ket disgrasyado nangruna no ma-direct hit dagiti luganda. Kuna met dagiti analyst a daytoy ket kasla pamutbuteng nga inaramid ti Tsina iti puwersa ti Pilipinas.

Tsk... tsk... teritoryotayo ti nagampayagan dagiti eroplano ti armada, ngem kasla guwardiyadon dagiti puwersa ti Tsina. Praktikalidad...kasla tagtagibassitenda ti kabaelantayo, saan aya? Ti imasna, kalaksidan iti protesta nga impila ti pagilian kontra iti inaramid ti Tsina...kasla nakakukot a manok piman ti pagiliantayo a mangirupir iti kalintegantayo. Sabagay, naming-anon nga inamin ti administrasyon nga awan gawaytayo no kas pangarigan ta makipinnatangkentayo kadagiti Tsino.

Kuna met dagiti analysts: pudno nga awan gawaytayo, ngem rumbeng laeng a maiparikna iti Tsina ti disgustotayo iti ar-aramidenda.

***

Simmingit a kontrobersiya ti plano kano ni Sen. Manny Pacquiao para iti kina-presidente iti masungad nga eleksiyon. Nagsisipul kada nagsasarumbinit dagiti eksena nga imbungana iti kagimongan. Nagbalin a timon ti saritaan iti amin a suli ti kagimongan ti simmaruno. Adda nagkuna a kurang pay ti ammo ni Manny tapno maidauluanna ti pagilian iti likud dagiti agsasamusam a parikut iti agdama. No koma ta bunga, saan pay kano daytoy a naluom. Amangan ta mapilit a kasla kinarburo. Adu met dagiti nagpalabas laeng gapu ta uray tumaray kano (Manny) dinto met laeng mangabak. Pudno kano a nabaknangen. Adun ti pirak a gastuenna iti kampanya, ngem edukado kanon dagiti botante. Dikan basta-basta puraren iti papel de bangko ti utekda. Adun dagiti nagpasaranda a pannubok ti pulitika ditoy Pilipinas. Adun dagiti leksiyon iti naglabas a panpandaganda.

Kuna met dagiti praktikal: amin a kwalipikado, addaanda iti karbengan a tumaray iti aniaman a puwesto iti gobyerno. Ngem adda met insilpo dagiti sutil: no kas pangarigan ta aggiddan a tumaray da Sara Duterte ken Manny... saan ngata a magudua ti butosda wenno suporta dagiti adda iti Team-Duterte? No dayta ti eksena, saan ngata a ti lumsot ket ti maikatlo wenno dadduma pay a kandidato ta sulido ti botosda? No dayta ti mapasamak... agpalakpak kano dagiti adda iti oposisyon, saan aya pards? Wen aya! Iti agdama...adu dagiti mapespeselen dagiti umili a potensiyal a tumaray iti kina-presidente: Poe, Robredo, Villar, Lacson, Gordon, Moreno, Sara Duterte, Bong Go ken adu pay. Ti imasna pettat met a simmingit ti nagan a Pacman. Wow, kunada... grabe daytoy a laban inton eleksiyon. Tay kunadan: Matira ang matibay. Good luck!

***

Intayon sublian ti tema ti Karit ita nga aldaw: Pimmalpak kano a Build Build Build Program ni Pres. Duterte. “Hindi bigo ang Build Build Build Program ng Duterte Administration!” Dayta ti nabatad a kinuna itay nabiit ni Bases and Conversion Development Authority (BCDA) President and CEO Vivencio “Vince” Dizon. Saan nga umanamong a maawagan a saan kano nga epektibo ti nakuna a programa ti administrasyon. Kinapudnona, kas kuna ni Dizon nga adun kadagiti flagship projects ti Duterte Administration ti nairingpasen. Kadagita a proyektos, 35 ti agdama a maisaysayangkat; 32 ti mairingpas iti uneg ti ennem agingga’t walo a bulan; 21 ti adddan iti advance stages ti government approval ken 12 ti addan iti advance stages ti feasibilities. Inlawlawag ni Dizon a ti record nga eggem ni Sen. Franklin Drilon ket “daanen.” Dayta ti nangibasaran ni Drilon iti kinunana a “dismal failure” ti Build Build Build Program ti Duterte Administration.

Dayta kano a “daan´a rekord ti nangibasaran ti senador tapno ibagana a “pimmalpak” ti programa ni Pres. Duterte. Innayon pay ni Dizon a saan nga inkari ni Pres. Duterte a mairingpas amin dagita a patrabaho wenno programa ti Build Build Build iti uneg ti terminona. Tsk tsk...ti adal dita: agsukisuktayo koma a naimbag sakbay nga intay ipir-ak ti pammabalaw. ‘Nianto ngata ti kontra-basnot ni Pres. Duterte iti daytoy a banag? Adios mi amor, ciao, mabalos!


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

More Local
Baguio For a better Baguio
yesterday at 01:15 AM
Baguio Saving earth through art
yesterday at 01:14 AM
Baguio Hotspot
yesterday at 01:10 AM
Baguio Unsung hero
yesterday at 01:10 AM
Baguio I-ACT Metro Baguio launched
yesterday at 01:03 AM
sunstar.com.ph