NASAKITAN busa gusto ipanimalos sa kampo ni International Boxing Federation (IBF) Super Flyweight champion Jerwin “Pretty Boy” Ancajas ang unom ka sunod-sunod nga kapildihan sa mga Pinoy boxers nga miaway sa Amerika.
Ang head trainer ug sa samang higayon manager ni Ancajas nga si Joven Hallasgo Jimenez nga nahinabi exclusive sa Superbalita Cebu nga gibati sa Team Ancajas ang kaguol human napakyas ang mga Pinoy batok sa ilang mga kontra sugod niadtong entrada sa Nobyembre 2018.
“Pagsikapan po namin na manalo kahit five months na po ang preparation ni Jerwin sa laban na ito. Gagawin po namin ang lahat para makabawi po tayo sa mga natalong mga Pinoy boxers,” pasabot ni Jimenez.
Si Panabo City, Davao del Norte native Ancajas, 27 anyos, 5'6" (31-1-2, 21KO) kasamtangang nagpadayon sa training sa Rock Boxing Gym sa Carson City California aron moasdang ni challenger Miguel “Aguja/Needle/Dagum” Gonzalez nga gikan sa nasod sa Chile sa South America.
Dili sayon ang kontra ni Ancajas nga si Gonzalez (31-2, 8KO), gawas nga beterano, 30, 5’3," siya kasamtangang World Boxing Association (WBA) Fedelatin Super Flyweight champion, WBA rated number 10 ug IBF rated number 14.
Nasayran nga human nakanselar ang ikawalo nga pagdepensa ni Ancajas niadtong Nobiyembre 2 sa Carson, California batok ni Mexican Jonathan “Titan” Rodriguez, ang Top Rank Promotions daling mihulma sa Ancajas versus Gonzalez fight karong Sabado, Disyembre 7 (Domingo RP Time) inga ipahigayon sa Puebla, Mexico ug isalida sa ESPN+ pay-per-view.
Top supporting main event ang Ancajas versus Gonzalez sa pagdepensa ni Mexican Emanuel Navarrete batok sa iyang katagi nasod nga si Francisco Horta alang sa World Boxing Organization Super Bantamweight 122-lb title.
Sa pikas bahin molabang ang team Ancajas gikan sa US padulong sa Mexico karong Nobiyembre 30 aron maka-adjust sila sa winter weather sa US ingon man sa fight venue.
Gitun-an karon sa Team Ancajas ang mga video fights ni Gonzalez, diin gihulagway sa mga boxing fans nga susama ra sila sa style ni Rodriguez nga maisugong moatake sa kontra.
Samtang ang mga Pinoy boxers nga misulong apan napildi sa Amerika ning bag-o kinsa gusto ipanimalos ni Ancajas gilangkuban nila ni Romero Duno, Jessie Cris Rosales, Recky Dulay, Mark Bernaldez, Raymond Tabugon, Raymond Tabugon ug Edward Heno.
Sa miaging gabii sa Los Angeles, California miduwa sa main event sa Thursday Night Fights nga gidalit sa Golden Boy Promotions si Cebuano Mercito “No Mercy” Gesta batok ni Mexican-American Carlos “The Solution” Morales apan ang resulta technical majority draw human sa accidental headbutt sa round 6. (Daniel Quindao Guden, US Correspondent)