LIMA ka bugaw nasikop samtang walo ka babaye ang na-rescue sa kapulisan sa Dakbayan sa Talisay sa gihimo nga entrapment operation sa Sitio Sangi, Barangay Tabunok, Dakbayan sa Talisay alas 3:30 sa kaadlawon, Dominggo Nobyembre 17, 2019.
Ang mga dinakpan giila nga sila Jessica Sodareo, 49, Diome Mission, 50, parehong taga Barangay Lagtang, Dakbayan sa Talisay. Nasikop usab sila Danilo Bangkaya, 60, taga Dawis Ramona, Dakbayan sa Talisay City; Raul Barcosa, 46, molupyo sa Barangay Pardo, Dakbayan sa Sugbo; ug Reno Diacamos, 34, taga Barangay Lipata, lungsod sa Minglanilla.
Gitug-an ni Police Major Gerard Ace Pelare, hepe sa Talisay City Police Station, nakadawat sila og report gikan sa mga concerned citizen sa lantaran nga pagpamugaw ug prostitusyon sa maong lugar.
Matud ni Pelare nga base sa gihimo nga pakisusi, pipila ka tuig na kining klase sa ilegal nga transaksyon sa lugar.
Nangulo ang Women's and Children Protection Desk (WCPD) kauban ang Talisay City Social Welfare sa gihimo nga operasyon.
Nakigtransaksyon ang pipila ka police decoy sa mga bugaw. Sa dihang nagbinayranay na, dali nga gihimo ang pagpanakop ug pag-rescue.
Ang mga dinakpan napriso sa Talisay City detention cell ug gikatakdang pasakaan og kasong' kalapasan sa RA 9208 o Anti-Trafficking in Persons Act of 2003 Lunes, Nobyembre 18.
Samtang Gipaubos sa kustodiya sa CSWD ang mga na-rescue nga kababayen-an. (FMD)