KINATIBUK-ANG 81 ka pamilya ang personal nga gihatdan og tabang ni Senator Christopher Lawrence "Bong" Go niadtong Sabado, Nobyembre 16, sa Barangay Carmen, Siyudad sa Cagayan de Oro.
Moabot sa 70 ka pamilya gikan sa Barangay Carmen ug 11 gikan sa Lapasan.
Personal nga kuwarta ang gihatag niini sa nasunogan nga moabot sa tag P2,000 samtang lakip ang nagkalain-laing ahensya moabot sa P10,000, wala pay labot niini ang mga food supply, goods ug uban pa nga panginahanglanon.
Ang nagrenta adunay tag P3,000 nga madawat.
"Sige rako balik-balik dinhi sa Cagayan de Oro kay sige mo kasunogan. Pagbantay sab mo nga malikayan kining sunog," matud ni Go ngadto sa mga biktima.
Matud sa senador, aduna siya’y giduso nga balaudnon nga mao kining Fire Protection Modernization Act kon asa hatagan og mga firetrucks ang siyudad ug kabarangayan ug dugang mga bombero aron panahon sa sunog ang barangay na mismo maoy una nga makaresponde.