SAMDAN ang mga estudyante lakip na ang magtutudlo ug drayber human natuwad ang gisakyan nga dyip niadtong mga alas 2:40 sa hapon, Biyernes, Nobyembre 15, sa Macapagal drive, Upper Carmen, ning Siyudad sa Cagayan de Oro.
Padulong na mopauli ang mga tinun-an gikan sa recollection dihang nahitabo ang disgrasya.
Sakay sa dyip nga gipakyaw sa Merry Child High School sa Bulua mao ang magtutudlo nga si Ricson Pacatang, 23, ulitawo ug residente sa Barangay Cugman, ug mga tinun-an.
Samtang tulo ka mga sakyanan ang nalambigit sa maong panghitabo, una mao ang Mitsubishi Mirage nga adunay plate number ACB-5231 nga gimaneho ni Amparo Dinagsao, 45, minyo, taga P.N Road Subdivision Calaanan; Toyota Vios nga adunay plate number KDT-743 nga gimaneho ni Bryan Balazo, 37, ulitawo nga taga NHA, Barangay Kauswagan; ug ang dyip nga gimaneho ni Jhonel Dacillo, 30, ulitawo, taga Barangay Iponan.
Sa inisyal nga imbestigasiyon gikan sa kapulisan sa Police Station 4 (PS4) sa Carmen, gikabutyag nga nawad-an og brake ang dyip rason sa maong panghitabo.
Ang Mitsubishi Mirage pakanaog sa Macapagal drive paingon sa habagatang direksiyon samtang ang Vios ang nakaparada sa may Macapagal drive.
Dihang nawad-an na og kontrol ang maong dyip, nabanggaan niini ang Mirage ug padayon nga nibangga sa maong Vios nga nakaparada. Sa kalit ug kakusog sa impact, nabalintong ang maong dyip rason nga samdan ang mga sakay niini.
Suwerteng wala’y nakabsan atol sa maong panghitabo.
Nakaangkon usab og gamay nga samad ang drayber kinsa kasamtangang anaa sa kustodiya sa kapulisan sa Police Station 4, samtang gikustodiya usab sa tinugyanan sa Roads and Traffic Administration (RTA) ang nahisgutang dyip.