NAKAIKYAS gikan sa mga kidnapper ang 14-anyos dihang ibalhin unta kini og sakyanan human gidagit pasado alas 3 sa hapon sa Maramag, Bukidnon.
Suwerteng nakaikyas si alyas Bryan, 17, taga Kalumihan, Kitaotao, Bukidnon.
Sa nahipos nga impormasiyon, gikabutyag nga gidagit si Bryan sa wala mailang mga suspek.
Gikabutyag nga mga 50 metros gikan sa ilang tunghaan sa Philippine Countryville College Inc., kinsa pugsanong gipasakay sa Nissan van nga kolor maroon.
Sa pakighinabi sa SunStar Superbalita Cagayan de Oro kang Police Major Evan Viñas, tigpamaba sa Cagayan de Oro City Police Office (Cocpo), gibutyag nga suwerteng nakaikyas ang biktima gikan sa mga suspek dihang ibalhin kini sa laing sakyanan.
"Naka-chance siya lighot pagkahiplos karatil siya dagan hangtod nakaabot sa Divisoria area, diha Nazareth area gikan siya nagdagandagan. Wala namay laing natala nga biktima," matud ni Viñas.
Giingong samtang nagpatrolya ang kapulisan sa Police Station 1, na-monitor niini ang flash alarm kalabot na sa gikatahong kidnapping sa Bukidnon ug nasiplatan ang sakyanan nga susama og deskripsiyon.
Dihang nilabay sa maong dapit nakita sa kapulisan ang menor de edad nga nagtindog ug nangamay kanila hinungdan nga giduol sa kapulisan ug nasutang kini ang biktima.
Posibleng motibo sa pagpangdagit mao ang pakigrelasyon niini.
"Gikan to sa Maramag, Bukidnon. Typical Bisaya accent. Mga suspects wala niya maila, kato siya gitransfer to sa laing sakyanan. Motibo duol sa bawal na pag-ibig," dugang ni Viñas.
Atol sa panghitabo, nagkurog pa ug susamang nakurat kaayo ang maong menor de edad.
Nabalik na usab kini ngadto sa iyang mga ginikanan human naluwas usab sa mga otoridad.