NAPALGANG naglutaw sa suba ang usa ka maestro kinsa nahanaw sa pila ka adlaw ug gituohang naghunos sa kaugalingon tungod sa nasinatiang depresiyon.
Nakita ang patay nga lawas nga naglutaw sa suba mga alas 1:45 sa hapon niadtong Biyernes, Nobyembre 15, 2019.
Giila sa kapulisan ang maestro nga si Garry Pabillaran, 46, usa ka bisexual ug residente sa Biasong, Barangay Macasandig, ning Siyudad sa Cagayan de Oro.
Gibutyag ni Police Major Ericson Sabanal, hepe sa Police Station 9 (PS9) sa Macasandig, nga posibleng nagpakamatay kini human nga nigawas ang resulta sa pagpa check-up.
Gikabutyag nga nausab na ang pamatasan niini human nasayod nga aduna kini cancer.
"Posibleng iyang gihunosan iyang kinabuhi after nigawas ang resulta kay nagpa check-up man ni siya. Didto ang finding sa doctor nga aduna siya’y cancer," matud ni Sabanal.
Samtang gibutyag sa pamilya nga dili ga-istorya ang maestro sa iyang nasinatiang problema ug gani luya ang balatian niini.
Gidugang pa nga gani wala pa gibutyag sa doktor nga cancer ang gihambin niini human adunay nihubag sa iyang liog nga bahin, apan gikaguol na kaayo niini.
Gidugang pa nga anaa na sa duha ngadto sa upat ka mga adlaw kini nga nahanaw hangtod nga napalgan nalang nga naglutaw.
Ang patay nga lawas ang giatiman na sa nahabiling pamilya diha sa St. Peter’s Funeral Homes.