UPAT ka mga medalyang bulawan ang nabitbit sa lungsod sa Compostela dihang nag-overall champion kini sa boksing atol sa 2019 Provincial Athletic Association Meet nga nahuman, Biyernes, Nobyembre 15, 2019.
Garbo sa lungsod ang upat ka mga boksidor nga sila Keirut Cabilan, Ken Pangan, Jimboy Anuncio, ug Elvico Canto nga pulos sakop sa Calalas Boxing Team nga gidumala ni Konsehal Allan Calalas sa lungsod sa Compostela.
Nagsugod ang 2019 Compostela Valley Province Athletic Association (CVPAA) Meet, Lunes, Nobiyembre 11, nga gisalmutan sa 11 ka mga lungsod sa probinsiya sa Compostela Valley nga nagtigi sa nagkadaiyang paugnat sa kusog, usa niini ang boksing.
Matud pa nga gawas sa upat ka mga bulawang medalya nga nabitbit sa Calalas Boxing team, nasakmit sab sa usa pa ka boksidor sa tim nga si Jake Andrew Pepito ang silver samtang sila Aivan Kien Amada, Alexander Maanghup, ug Kenneth Pukapotan nakakuha sab ang tulo ka mga bronze nga medalya.
Dako ang pasalamat ni Konsehal Allan Calalas sa lima niya ka mga coaches nga sila Jonjie Obeda, Jigger Rustia, Lito Ambros, Jifel ug Epo Polistico nga maoy katambayong sa pag-umol sa mga batan-ong boksidor sa lungsod sa Compostela aron makab-ot ang gipangandoy nga kalampusan.
Bag-ohay lamang nagkampeyon ang tim sa Invitational Boxing Tournament sa Davao Region nga gihimo dungan sa 4th Araw ng Malita, Davao Occidental diin walo sa napulo ka mga boksidor ang midaug sa torneyo.
Ang sunod-sunod nga kadaugan nga naangkon sa tim alang kang Calalas sinugdanan pa lamang sa pangandoy nga makabaton ang lungsod sa Compostela og usa ka boksidor nga mahisama kang Senador Manny Pacquio nga nagkampeyon dili lamang sa larangan sa boksing, kundi lakip sa larangan sa pulitika.