Genoguin: Kaya ba ni Robredo?

SA KASAYSAYAN sa politika sa atong nasud, karon pa nahitabo nga ang mortal nga kaaway sa politika sangunan ug dili basta basta nga posisyon sa administrasyon sama kang Bise Presidente Leni Robredo.

Bag-o kini nahitabo, gibanatan na pag-ayo sa bise presidente ang atong presidente nga pakyas sa kampanya batok sa ginadili nga droga ug gawas niana, madugo daw kuno ang kampanya niini sigon sa ilang gipahaba ngadto sa mga international human rights groups.

Kabahin usab sa ato, dili ti-aw ang iyang pagsaway sa pagka mahilabtanon sa bise presidente nga matud pa niya, wala’y kaugmaon ug wala’y direksyon ang Pilipinas kung si Robredo ang mahimong presidente.

Pero kalit milubad ang tanan, tungod kay kalit lang niya nga gihatag ang kaakohan sa kampanya sa pagbatok sa ginadili nga droga nga gikatingad-an sa atong katawhang Pilipinhon.

Dinhi nahimugso ang nagkada-iyang mga pangutanana, sinsero kaha ang presidente sa pagtanyag niining maong posisyon?

Unang katarungan, iya na bang gi-angkon nga pakyas siya niining maong kampanya ug wala siya'y nahimo, sanglit midagsa naman hinuon ang mga ginadili nga droga sa atong nasud ug lakip na ang pipila ka sakop Philippine National Police (PNP) nalambigit naman hinuon niini?

Mosugot kaha ang atong presidente nga molampos si Robredo sa maong tahas, nga makapakusog sa iyang politikanhong tinguha sa pagka-presidente sa tuig 2022?

Duda kita nga kini usa ka dakong paon, aron malusno ang politikanhong ambisyon niining bayhana nga mahumot siya kon magmalampuson man sa iyang ambisyon nga mag-presidente sa presidential elections sa 2022.

Ari kita sa bahin ni Robredo, daghan ang mga pangutana kon nganong gikubit niya ang maong tahas? Dili gani kaya sa atong presidente, siya pa kaha?

Karon wa pa gani makasugod sa iyang trabaho, nangayo na og tabang gikan sa Amerika kon unsay angay buhaton sa pagsumpo sa ginadili nga droga? Ang buot bang ipasabot dinhi nga wala gyud siya’y kabangkaagan bisan kon gamay kaayo nagpakitabang naman?

Ang wala ma-isip ni Robredo nga dako pud og suliran ang America sa droga nga nagagikan sa nasud Mexico nga misulod sa ubang estado sa Amerika? Pangutana, gidawat ba kini sa bise presidente tungod kay Amerika ang iyang gisaligan?

Kining tanan pulos pangutana lang, hinayhinay natong mahibaw-an ang resulta pagsugod na niya sa iyang katungdanan.

Hinaut magmalampuson siya aron molampos pud siya sa iyang ambisiyon, bisan og para kanato layo ra’s tinuod, dili kaha maguba ang iyang ambisyon? Kaya ba ni Robredo pagsumpo ang mga ginadili nga droga? Atangi.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph