BRAULIO E. DUJALI, Davao del Norte -- Gipahiluna na ang patay'ng lawas sa usa ka lalaki nga namatay dihang napantok ang ulo sa semento pasado alas 5:50 sa hapon, Sabado, Nobyembre 16, sa Dapecol Park, Dapecol Compound, Barangay Tanglaw.
Ang namatay giila nga si Generoso Balucan Laguna, 53 anyos, ug molupyo sa Bayugan 1, Agusan del Sur ug usa ka Good Conduct Time Allowance (GCTA) surrenderer.
Base sa inisyal nga imbestigasyon, ang biktima kauban sa iyang mga kaubanang GCTA surrenderer kinsa nag-inom og ilimnong makahubog duol sa tindahan sulod sa park sa compound sa Dapecol.
Wala madugay, ang biktima miadto sa iyang bunkhouse apan aksidente kining nadalin-as ug napantok ang ulo sa konkretong semento nga salog diin miresulta sa iyang hinanaling kamatayon.
Patay'ng lawas sa biktima gidala sa Dapecol Hospital alang sa eksaminasyon.