BANSALAN, Davao del Sur -- Gikan sa silingang lungsod sa Magsaysay, hungihong anaa karon sa lungsod ang gituohang ungo.
Nagkaguliyang ang pipila ka mga molupyo sa Sitio Curvada, Barangay Poblacion Uno ug Lily Street sa Barangay Poblacion Dos human giatake sa wakwak ang duha ka mga babaye.
Unang nagkagubot sa Sitio Curvada human misyagit si Jessa, 37, dihang gikambras siya sa usa ka tawo nga taas ang buhok nga nakatabon sa nawong ug tag-as kaayo ang mga kuko.
Nahitabo ang insidente pagtongtong sa alas 12 sa tungang gabii niadtong Sabado, Nobyembre 16, dungan sa pagsubang sa dakong buwan.
Dili niini masulti kon lalaki o babaye ang maong aswang. Apan matod niya, aduna'y pako kinsa paspas nawala human nag-iyahay na pagdala og puspos ang mga silingan.
Sa dalang Lily, gibutyag sab ni Christine nga kalit aduna'y mikambras kaniya mao nga paspas siyang misyagit og tabang.
Nag-viral sab sa social media ang hisgutanan sa aswang human matod pa nga naglibot-libot kini sa mga barangay.
Sa Sitio Bagong Silang sa Barangay Managa, gibutyag sa pipila ka residente nga nakit-an nila ang usa ka sigbin dungan sab sa pagsubang sa bulan niadtong Biyernes sa gabii, Nobiyembre 15.
Kahinumduman nga human sa makusog nga linog, daghan na sa mga molupyo ang natulog gawas sa ilang balay pinaagi sa pagtukod og trapal ug tent.
Matod sa mga karaan, mogawas ang mga dautang nilalang human matay-og ang kayutaan.
Apan, subling nagpahimangno ang mga otoridad nga bantayan sa katawhan ang ilang mga kabtangan aron dili makasalisi ang mga kawatan.