Sugilanon: Ang lolo ni Fiona
CHITO E. GERMINO
Paknaan, Mandaue City, Cebu
ALAS siyete i-medya sa buntag. Nagsigeg patingog sa iyang pito ang tiguwang nga tawo atubangan sa Kapitolyo. PRRRRTTTT! PRRRRTTTT! PRRRRTTTT! Nagsinyas-sinyas siya sa mga sakyanan. Paghiagi sa dyip pasaheroan nga gisakyan ni Fiona nasabak sa iyang panan-aw ang maong tiguwang. Gikan siya sa Lahug diin atua ang balay sa iyang ginikanan. Moadto siya sa Cebu Doctors’ Hospital, kay isip usa ka nursing student, duna siyay kuhaong ‘laboratory result’ sa ospital.
Mihunong ang dyip dihang mipula ang suga sa traffic light. Dihay misakay nga babayeng estudyante.
“Uy, Fiona, nganong sige man kag tan-aw anang tiguwang nga buang?” ni Mila nga bag-ong sakay. Klasmeyt sila ni Fiona. Milingkod kini atbang ni Fiona sa walang habig sa dyip.
“Ako man god nang Lolo tawhana. Luoy kaayo ko niya!” ni Fiona nga namahid sa luha nga milugmaw sa iyang mata.
“Ha?! Sorry, Fiona, ha, nga ginganlan nakog buang imong Lolo!” ni Mila.
“Aw, wa man tay mahimo. Mora na man gyud na siyag buang,” ni Fiona nga miping-it.
“Nganong naingon ana man siya?” ni Mila.
“Traffic enforcer man god na siya kaniadto. Unya miretiro na. Bisag di na siya patrabahuon, magsige man gihapon siyag trapik!” ni Fiona.
“Amahan na siya sa imong mama o papa?” ni Mila.
“Sa akong papa.”
“Pila man ka buok igsuon sa imong papa?”
“Lima man na sila.”
“Pila ka buok lalake?” ni Mila.
“Tulo,” ni Fiona.
“Wa diay kabadlong imong papa ug ang iyang mga igsuong lalake?”
“Mobadlong man sila, apan mahimo lang away, kay gahi man gyud kaayog ulo ang akong Lolo. Lisod nang tiguwang nga giango-ango na. Di patuo. Ang-ang mag gapuson. Gipasagdahan na lang na nila!” ni Fiona.
Nagkapanglingo-lingo si Mila.
“Maluoy lang kong Lolo,” padayong miasoy si Fiona. “Kay pinangga kaayo ko ana niya. Siyay drayber nako sa kinder pa ko ug sa elementarya. Hatod-kuha ko niya sa eskuylahan kaniadto.”
“Mao ba?” ni Mila
“Yes,” ni Fiona. “Unya maayo siyag tingog. Sa gamay pa ko kaayo, tres ngadtos kuwatro akong edad, kuguson ko ana niya kon makamatngon siya nga nagduka ko. Kantahan ko niya. Ug mahikatulog ko dayon.”
“Luoya diay sa imong Lolo, no?!” ni Mila.
“Mao lagi. Lisod ang tiguwang kon ango-anguhon na. Wa masayod nga may depekto na ang iyang utok,” ni Fiona.
Unya milarga ang dyip dihang mi-berde na ang suga sa traffic light.
Nagkalayo na sa panan-aw ni Fiona ang iyang Lolo. Nagkahinay na sa iyang pandungog ang kalanggis sa tunog sa pinituhan sa tiguwang. Didto sa iyang hunahuna nakahukom siya nga mag-research mahitungod sa hinungdan sa ‘ango-ango.’ Basin pag may kaayuhan pa ang sakit sa iyang Lolo. (KATAPUSAN)