GUSTONG ipanimalos ni IBF Super flyweight champion Jerwin Ancajas ang mga kapildihan sa unom ka mga Pinoy boxers nga bag-o lang niaway sa Amerika.
Ang trainer/manager ni Ancajas nga si Joven Jimenez, sa dihang gikahinabi sa Superbalita Cebu pinaagi sa online, mitug-an nga naguol si Ancajas nga nagsud-ong sa kapildihan sa iyang mga kataganasod sugod sa sayong bahin ning buwana.
Gipangtumbok mao sila si Romero Duno, Jessie Cris Rosales, Recky Dulay, Mark Bernaldez, Raymond Tabugon, Raymond Tabugon ug Edward Heno.
“Pagsikapan po namin na manalo, kahit five months na po ang preparation ni Jerwin sa laban na ito. Gagawin po namin ang lahat para makabawi po tayo sa mga natalong mga pinoy boxers” pasabot ni Jimenez.
Ang lumad nga taga Panabo City, Davao del Norte native nga Ancajas, 27 anyos, 5’6 (31-1-2, 21KO) kasamtangang nagpadayon sa training sa Rock Boxing Gym sa Carson City California aron moasdang ni challenger Miguel “Aguja/Needle/Dagum” Gonzalez nga gikan sa nasod sa Chile sa South America.
Sayod si Ancajas nga dili sayon ikontra ang 30-anyos nga Gonzalez (31-2, 8KO) sanglit siya ang kasamtangang World Boxing Association (WBA) Fedelatin Super Flyweight champion, WBA rated # 10 ug IBF rated # 14.
Si Gonzalez maoy hulip sa laing Mexicano nga si Jonathan “Titan” Rodriguez kinsa wa makakuha og US visa hinungdan sa pagkanselar ang iyang away batok ni Ancajas nga gikatakda unta niadtong Nobiyembre 2 sa California.
Gumikan niini, ang Top Rank Promotions daling mihulma sa Ancajas vs Gonzalez fight karong Disyembre 7, 2019 Sabado (Domingo RP Time) sa Puebla, Mexico. Molarga si Ancajas karong Nobiyembre 30 paingon sa Mexico. (Daniel Quindao Guden, US Correspondent)