HUGOT nga panag-engkuwentro ang gipaabot nga masaksihan karong gabii sa dihang sugdan na ang best-of-three finals tali sa multi-titled University of the Visayas Green Lancers ug sa Southwestern University-Phinma Cobras sa 2019 Cebu Schools Athletic Foundation, Inc. (Cesafi) Partner’s Cup sa Cebu Coliseum.
Ang Lancers nga maoy miangkon sa no. 1 spot sa elimination round mipukan sa no. 4 University of San Carlos (USC) Warriors, 78-70, niadtong Lunes samtang ang Cobras nga maoy nakaangkon sa no. 2 seat yano ra usab nga midispatsar sa seeded no. 3 sa University of Cebu (UC) Webmasters nianang pagka Martes, 84-72, sa ilang tagsatagsa ka semifinal match.
Mosulod sa korte ang Cobras karong gabii nga taas ang moral sanglit sila lang ang bugtong team nga nakapildi sa Lancers sa double-elimination round.
Niadtong Hulyo 27, ang Cobras mipakaging sa Lancers, 77-74. Apan bisan pa sa kaparutan, ang UV pabilin nga maoy naghupot sa no. 1 spot nga may 10-1 nga baraha.
Ang SWU mitapos sa elimination nga nagsapwang sa 9-3 nga record nga igo na kaayo alang sa ikaduhang puwesto.
Sigon sa gipaabot, si SWU coach Mike Reyes mosandig sa iyang opensa ngadto sa ilang import nga si Lamine Thiam ug ingon man sa suporta sa mga locals nga sila si Red Cachuela ug ni Gerald Fernandez.
Hinuon si UV coach Garry Cortes andam ug adunay ikaparang batok ni Thiam nga ang ilang African nga si Lass Coulibally.
Gilauman usab ni Cortes sa suporta sa iyang mga locals nga pinangulohan nila ni Jancork Cabahug, Geliant Delator ug Sheldon Gahi.
Subay niini, usab karong hapon sa alas 5:30 ang takna sa haon ang championship series sa high school division.
Hangtod ning pagsulat, padayon pang giduwa ang semifinals matches sa secondary level kagahapon sa Cebu Coliseum.
Nagsangka sa semis ang Hotel Fortuna-University of Cebu (UC) Baby Webmasters ug University of San Jose Recoletos (USJ-R) Baby Jaguars nagtakos usab ang UV Baby Lancers ug Ateneo Magis Eagles sa laing semis game.
Ang modaog ning mga duwaa maoy mag-abot sa best-of-three finals. (JBM)