Lalake kritikal sud sa ospital human gidunggab sa higala

KRITIKAL ang sitwasyon sa usa ka lalake human dunggaba pila ka higayon sa iyang higala nga maoy nagpapuyo kaniya sa balay.

Si PSsgt.John Errick Samosa nagkanayon nga ang biktima mao si Joseph Cabingatan, 30, molupyo sa Sityo Upper Puti, Barangay Buhisan, siyudad sa Sugbo.

Samtang, ang suspek nailhan nga si Chito Sarsalejo, 24, kinsa maoy tag-iya sa balay diin nagpuyo ang biktima.

Matod ni Samosa, nahitabo ang pagpanunggab pasado alas 12:00 sa udto niadtong Sabado, Nobiyembre 16.

Sa imbestigasyon sa kapulisan nasuta nga naglalis ang duha nga nisangko sa pagdunggab sa suspek sa biktima.

Si Cabingatan nakaangkon og samad dinunggaban samtang ang suspek kasamtangang naa sa detention cell sa Labangon Police Station human madakpi.

Si Cabingatan anaa sa usa ka tambalanan ug pabiling giobserbahan sa doktor.

Ang dinakpan dihang nahinabi sa Superbalita Cebu, niangkon nga iyang gidunggab ang iyang amigo human nga wala na kaantos, labi na nga ang iyang manghud nga giapil na sa biktima nga iyang gikontra.

Dugang sa suspek nga iyang gipapuyo sa ilang balay apan midako na ang ulo.

“Nayawaan nako mura na og sungayan mao nang ako nato gidunggab,” matod ni Chito.

Kaso nga frustrated murder ang atubangon sa suspek kon mopadayon ang biktima nga mosang-at og kaso batok sa suspek. (BBT)

Related Stories

No stories found.
SunStar Publishing Inc.
www.sunstar.com.ph