DILI lang mga nalambigit sa ilegal nga drugas ug sugal ang gigukod ug gisumpo sa kapulisan sa dakbayan sa Talisay, lakip na ang pagsiaw sa prostitusyon.
Mao kini hinungdan nga lima ka mga bugaw ang nasikop ug walo ka mga babaye ang naluwas sa kapulisan atol sa entrapment operation sa Barangay Tabunok.
Gihimo ang operasyon, alas 3:30 sa kaadlawon, Dominggo, Nobiyembre 17, sa Sitio Sangi, Tabunok.
Ang mga dinakpan ang giila nga sila Jessica Sodareo, 49, ug Diome Mission, 50, pulos taga Barangay Lagtang, Talisay.
Nasikop usab sila Danilo Bangkaya, 60, taga Dawis Ramona, Talisay; Raul Barcosa, 46, molupyo sa barangay Pardo, siyudad sa Sugbo; ug Reno Diacamos, 34, taga Barangay Lipata, lungsod sa Minglanilla.
Gitug-an ni Police Major Gerard Ace Pelare, hepe sa Talisay City Police Station, nga nakadawat sila og report gikan sa mga concerned citizen bahin sa dayag nga pagpamugaw ug prostitusyon sa maong lugar.
Matod ni Pelare, nga base sa gihimo nga pakisusi, pipila ka tuig na kining klase sa ilegal nga transaksyon sa naasoy nga lugar.
Gumikan niini, nakig-alayon sila sa Talisay City Social Welfare and Development (CSWD) ug pinanguluhan sa Womens and Children Protection Desk (WCPD) gihimo ang operasyon.
Pipila sa mga pulis ang gihimo nga decoy nga nakig-transaksyon sa mga bugaw, sa dihang nagbinayranay na alang sa lawasnong kalipay, ug anaa na ang mga babayeng’ gibugaw. Dali nga gihimo ang pagpanakop ug pagluwas sa mga babaye.
Ang mga dinakpan ang napriso sa Talisay City detention cell ug gikatakdang pasakaan og kaso nga kalapasan sa Republic Act 9208 (to eliminate trafficking in persons, especially women and children), karong Lunes, Nobiyembre 18.
Samtang, ang mga naluwas nga kababayen-an ang gipaubos sa kustodiya sa CSWD.
Sigon ni Pelare nga ang pagkasikop sa mga bugaw ug pagluwas sa mga babaye usa sa ilang gilantawan pagsumpo sa posibleng’ pagkuyanap sa sakit dala sa human immunodeficiency virus (HIV).
Dugang sa hepe nga nakita usab nila nga sa prostitusyon, posibleng lain kini nga lugar diin mahitabo ang pagnegusyo sa ilegal nga drugas.
“Talisay City will not allow prostitution and the PNP will do its part to help minimizing the spread of HIV,” saysay ni Pelare. (FMD)