NAGBANGOTAN ang Land Transportation Office (LTO) 7 sa N. Bacalso Ave., siyudad sa Sugbo?
Niparada og porlon, lungon, pungpong sa buwak ug guba nga mga motorsiklo nga gikarga og flat bed truck isip simbolo ug paghinumdom sa mga tawo nga nitaliwan gumikan sa disgrasya sa kadalanan.
Si LTO 7 Regional Director Victor Caindec niingon nga paghandom kini sa World Day of Remembrance for Road Traffic Victims ug pagsangyaw ngadto sa mga motorista nga mag-amping kanunay aron malikayan ang disgrasya.
Si Caindec namahayag nga number one killer mao ang disgrasya nga naglambigit og motorsiklo diin sa Central Visayas di mominos upat ka disgrasya sa kadalanan ang mahitabo matag adlaw.
Ang pangulo sa LTO 7 nagkanayon nga ang Department of Transportation (DOTr) ang nagpasiugda sa maong kalihukan isip pag-apil sa kalibutanong paghandom sa mga nakalas ug naangol sa disgrasya sa kadalanan.
Dugang ni Caindec, sagad sa mga gibuhat sa ubang mga buhatan sa LTO mao ang pagpaimprinta og mga tarpaulin ug gipamutang sa mga strategic areas ug ang uban nihimo og information drive gamit ang mga motorsiklo ug ubang klase sa sakyanan.
Apan dinhi sa LTO 7, matod niya, nagpalahi ang drama sa information dissemination nga sama sa nagbangotan.
Pasabot niya nga mahitabo ang disgrasya gumikan sa reckless driving diin apil na niini ang over speeding, pagmaneho nga hubog ug dili pag sunod sa lagda sa trapiko.
Iyang giawhag ang mga motorista nga maminosan ang disgrasya kon ang matag usa mag-amping sa ilang pagpamaneho sa sakyanan ug makunhoran o walay makalas nga kinabuhi.
Ang LTO 7 nihalad og misa alang sa mga namatay sa disgrasya ug nangaliya usab sila nga maalim na sa ilang mga balatian kadtong naangol sa disgrasya ug likay sa aksidente. (PAC)