USA ka 34 anyos nga babaye ang masuk-anong nidangop sa Labangon Police Station sa Barangay Labangon, dakbayan sa Sugbo, kagahapon sa udto, Dominggo, Nobiyembre 17, human giingong gibunalan og monobloc nga bangko sa kapuyo nga langyaw.
Si Eva (dili tinuod ngan), molupyo sa usa ka barangay nga nasakop sa Labangon Police Station, nisaysay sa Womens and Children Protection Desk (WCPD) sa gibuhat kaniya ni Adrian Gregorio Griffiths, 58, British national ug temporaryong nanimuyo sa Sugbo.
Matod ni Eva, wala na siya makaantos human bunali og bangko ug nakaangkon og mga garas sa panit ug ubos sa iyang wala nga mata.
Nasayran nga bugtong rason nga di na siya ganahan nga makipag-sex kang Adrian tungod sa di na mobarog ang kinatawo niini.
“Nasuko siya nga di ko mosugot. Alangan, Sir, nga di na man mobarog ang iyaha unya baho pa jud og ilimnon,” pulong ni Eva.
Dugang saysay ni Eva nga kaniadto ang ilang pirme nga lalisan nga kon makipag-sex ang langyaw kaniya tungod lang sa kabaho sa ginhawa niini tungod sa pagsige og inom og bino.
Apan niining bag-o, dugang ni Eva, ang kinatawo na sa iyang uyab ang di mobarog hinungdan nga nawad-an na siya og gana nga makipag dulog.
Ug kagahapon, Dominggo, Nobiyembre 18, gibunalan na siya og bangko nga niresulta sa pag-init sa ulo sa biktima ug wala kapugong milakaw ug nangayo og pakitabang sa kapulisan sa Labangon.
Sila si Eva ug Adrian manag-uyab sulod na sa tulo ka tuig diin sinugdanan sa ilang panag-uyab nag-sugod sa chat sa Facebook.
"Siya may una nga ni-pm sa akoa sir, hangtud nga nagka amigo mi ug nagkauyab ug miari siya diria sa Cebu,” dugang ni Eva.
Apan si Adrian nihimakak sa pasangil sa iyang uyab ug matod niya, ang banko naa lang sa kilid ug wa siya namunal. Apan ang dinakpan nga si Adrian nakainom pa dihang pagdakop sa niresponde nga mga pulis.
Sa kasamtangan, si Adrian gibalhug sa Labangon Police Station ug posibleng mag-atubang og kaso nga pagpanapat sa kababayen-an ug physical injury subay sa kalapasan sa Akta Republika 9262. (B)