HUMAN sa clearing operation nga gimando sa Department of Interior and Local Government (DILG), lisod na nga makit-an ang mga dayan dayan para sa Pasko diha sa mga aseras.
Sa nangaging katuigan basta maghinangat na ang Pasko mamungingi sa mga dayan dayan nga para baligya ang mga manindahay sa aseras.
Sa mga nakatultol sa Tabo sa Banay, tua didto ang imong gipangita nga mga dayan dayan sa ubos kaayo nga presyo.
Mga inato nga Christmas decorations. Kon gusto ka og mahalon deretso nalang sa mga mall. May daghan sab nga display sa palibot sa Carbon market.
Ang giingon sa mga manindahay nga napagan sa clearing operation, mingaw ang umaabot nga Pasko alang sa ilang pamilya. Kini tungod kay wa nay klaro ang ilang kinitaan.
Pun-an pa sa datahan sa mga tigpatanto. Mao sab ni ang nalantawan sa mga taxi driver nga atong nahinabi. Sa una, Oktubre pa lang sayon rang tigumon ang para sa abang ug gasolina.
Kini hinungdan nga mas daghang taxi driver ang mangita og ka drayban. Lisod ang pagdrayb og taxi tungod sa kadaghan sa gustong mo-drive.
Karon ang mga operator mao na sab ang nangita kinsay maka-drive sa ilang mga unit nga namuwak diha sa mga grahianan.
Kining pagtidlom sa gidaghanon sa mga taxi driver nag gumikan sa daghang hinungdan. Usa na niini mao ang gi-cancer nga dagan sa trapiko.
Ang ikaduha mao ang ilang giingon nga pagbaha sa operasyon sa habalhabal apil na ang Angkas. Ug ang ikatulo mao ang operasyon sa airconditioned nga bus ug modernong jeep.
Sa ato pa, nakibhangan og dako ang ilang pahat. Maoy hinungdan nga ang ubang taxi driver nangita og laing ka drayban.
Ang uban gani nila nagdrayb naman og Angkas apil na ang habalhabal. Kuhai lang og basi kanang gitanyag nga libreng sakay sa mga mall.
Pila ka libo ka pasahero ang gihakot sa ilang mga bus matag adlaw. Nganong mag-taxi man nga dia may libre.
Basi ning mga panghitabo karon, daghan kanila ang naglantaw nga unyag human sa Sinulog ambot og pila nalang ka buok ang molahutay pagmaneho og taxi.
Gawas siguro kon paus-usan ang abangan.
***
Kay nagsingabot naman ang Pasko, makita nato ang pagbukas sa mga kan-anan diha sa atong palibot.
Daghan ang nadani pagpamaligya og pagkaon apil na ang mga mainom nga makahupay sa kauhaw.
Akong naila-ila niadtong Sabado si Clienton John Bejoco, 36, ug dunay tulo ka anak. Iyang negosyo mao ang pagluto og sago.
Human maluto, iyaha ning sagulan og mangga, gatas ug ubang ingredients. Gitawag niya ni og mango tapioca. Gisud sa plastic bottle ug iyang isuroy sa palibot sa Carbon market.
Matod ni Clienton lima pa ka bulan kining iyang negosyo ug malipayon niyang gipahibalo nga nag-anam kadaghan ang iyang mga suki ug nisaka sab ang iyang production.
Kon pamugas lay hisgutan, mas bentaha ni sa kaniadto diin nagsalig lang iyang pamilya sa iyang pagka mangingihaw og baboy.
Kay nagsingabot naman ang Pasko, nanghinaot siya nga ang iyang ginagmayng patigayon mahimong kabahin sa dakong selebrasyon.