NAGKADAKO ang populasyon sa Metro Cebu uban sa iyang paspas nga pagtuyok sa ekonomiya. Apan ang iyang inprastraktura ug mga pasilidad naulahi ug kanunay nag-apas sa panginahanglan sa kalamboan.
Usa na niini mao ang pasilidad ug tinubdan sa tubig. Dili ba nasinati na karon ang kakuwang sa tubig. Daghan nang pagtuon kaniadto, gipasiugdahan sa pribadong sektor ug bisan sa kagamhanan, nalantawan nang daan kini nga problema.
Nasayran nga walay igong natural nga tinubdan sa tubig ang isla nga lalawigan sa Sugbo. Sa Metro Cebu, risgo nga mokunhod pag-ayo ang tubig nga tab-ang o mainom ug moabot na sa parat nga lebel sa dagat.
Base sa mga pagtuon, wala kini mapatuman sa hingpit tungod sa grabeng pamulitika. Matag bag-ong administrasyon sa lalawigan ug dakbayan sa Sugbo dunay iyang kaugalingong agenda sa pagdumala.
Ang nakapait - dili buot mosunod sa plano sa nag-unang administrasyon. Kanunay magsugod sa uno. Gustong moangkon sa garbo sa proyekto nga mapatuman. Mao kini ang atong basa sa estilo sa daghang administrayon nanglabay.
Gawas sa pulitika sa lokal nga kagamhanan, nahimong komplikado sa pulitika mismo sud sa Metropolitan Cebu Water District (MCWD) diin mas dayag na sa pagkakaron tungod sa nabaniog nga kagubot sud sa water facility.
Ang MCWD nahimong gamhanan o murag nahimong monopoliya sa tubig sa Metro Cebu. Naglisod ang ubang magduduwa sa industriya niadto. Dunay nakasud apan nag-agi kini sa kalisod sa paglusot sa buho sa dagom.
Ug karon, ang MCWD na mismo ang nipahibalo sa kaubos sa level sa tubig sa Jaclupan dam sa MCWD kon itandi sa Nobiyembre sa nangaging katuigan. Labing ubos sa panahon na ting-uwan sa miaging napulo ka tuig, sumala sa MCWD.
Madala pa kini, pamulitika gihapon?