NAHIMONG away ang tong-its tali sa tulo ka mga tawo human giingong namusil ang usa ka pulis nga usa sa mga nagduwa atol sa haya sa namatyan sa Barangay Langkas, lungsod sa Dalaguete, habagatang Sugbo niadtong Dominggo sa kaadlawon, Nobiyembre 17, 2019.
Ang pulis nga nadestino sa Dakbayan sa Sugbo giila nga si Police Staff Sergeant Mario Cartuciano, lumad sa mao nga barangay. Si Cartuciano nanghimakak nga siya namusil.
Si Police Major Rolan Aliser, hepe sa Dalaguete Police Station, niingon nga alas 2 sa kaadlawon niadtong Dominggo sa haya sa usa ka Genaro Ramos.
Si Cartuciano gireklamo ni Bobeth Delposo, kinsa niingon nga nagduwa sila ni Cartuciano ug sa usa ka Roel Fajardo og tong-its.Nagkalalis sila si Delposo ug Cartuciano kay buot nang moundang ang nahauna apan, di pa ganahan ang pulis.
Giingong niibot sa iyang armas si Cartuciano ug gipusil si Delposo apan, nakadagan mao nga wa maigo.
Nahitabo ang gukdanay ug giingong giusban og pusil ni Cartuciano si Delposo, wa gihapon maigo.
Si Delposo nakahigayon pagsumbong sa kapulisan human si Cartuciano misibat.
Pasado alas 10 sa Dominggo sa gabii, kuyog sa iyang labaw, Police Major Joemar Pomarejos, hepe sa Waterfront Police Station sa Cebu City Police Office, nitahan si Cartuciano sa Dalaguete Police Station.
Matod pa ni Pomarejos nga gitawagan siya ni Aliser sa nahitabo ug nipasalig siya nga iyang ipa-surrender dayon ni Cartuciano. Dugang pa ni Pomarejos nga di siya mo tolerate sa mga buhat sa iyang sakop kon sad-an.
Sa Lunes sa hapon, sila si Delposo ug Cartuciano nagkaestoryahanay na. Wa nay plano si Delposo sa pagpasaka og kaso batok sa pulis.
“Ni-file na to si Delposo og certificate of desistance kay nagkaistorya naman sila,” matod ni Aliser.
Gidis-armahan
Gipa imbargohan na sa iyang armas, badge ug identification (ID) card sa pagka pulis si Cartuciano.
Matod ni Police Colonel Geovanie Maines, officer-in-charge (OIC) sa Cebu City Police Office, kasamtangan nang giparelibohan sa katungdanan si Cartuciano. Gawas sa kasong kriminal, mag-atubang usab og kasong administratiba si Cartuciano nga iyang gihulagway nga grave offense kon tuohan ang pamahayag ni Delposo.
Tungod kay nakapabuto sa iyang armas si Cartuciano, automatic na nga adunay himuon nga imbestigasyon ang Regional Internal Affairs Service 7.
Dugang ni Maines nga kon mamatud-an nga sad-an ang iyang sakop, mahimong mataktak kini sa serbisyo.