ORMOC CITY, Leyte -- Mga sakop sa Ormoc City Disaster Risk Reduction and Management Office (CDRRMO) gihatagan og pasidungog sa lokal nga kagamhanan.
Human sa flag raising ceremony ganinang buntag, Lunes, Nobiyembre 18, 2019, sa hawanan sa City Hall gitunol ang plaque of appreciation.
Mismo si Mayor Richard Gomez ug Vice Mayor Toto Locsin Jr. ang nitunol sa moang pasidungog sa 14 ka mga sakop sa CDRRMO.
Ang mga sakop gipadala sa Makilala, Cotabato aron matabangan ang mga biktima sa linog sa search and rescue ug clearing operation.
Matod ni Dominic Eamiguel, team leader sa CDRRMO, ilang nakita ang kalisud sa lugar, gani daghan sila og narespondihan nga mga insidente atol sa ilang pag-abot.
Sama nalang sa usa ka volunteer nga nakuyapan, water tank nga naaksidente ug dunay pipila ka residente nga gihatud sa tambalanan gumikan sa diarrhea.
Gani si Vice Governor Shirlyn Macasarte - Villanueva ang hilabihang pasalamat sa kagamhanan sa Ormoc sa pagpadala og ayuda sa ilang lugar.
"She was very appreciative and gusto gani niya makig sister province. Ako siya giingnan nga Vice, City ang Ormoc. Ingon pud siya, Aw! pwede ra gani gihapon kuno," matod ni Eamiguel.
Gani, buot sa opisyal nga mobisita sa Ormoc aron usab personal nga makapasalamat sa mga opisyal ug sa mga nipadala og tabang.
Subay niini, ang LIGA nga mga barangay, nakatigom na usab karon og mga sinako nga hinabang sama sa bugas, delata, noodles, kape ug mga sinina alang sa mga biktima sa linog.
Matod ni Emma Fragata, sa Biyernes nila ipadala sa Makilala, Cotabato ang mga hinabang diin sa maong lugar nasinati ang grabeng kadaot ug liboang ka pamilya ang apektado.
Sayo ning buwana, si Gomez mi-aprobar sa P5,000,000 nga tabang alang sa lima ka lungsod nga apektado sa linog.
Alang sa Mayor, agi kini og bawos sa syudad ngadto sa Mindanao kahuman ang Ormoc gitabangan usab sa miagi nga mga kalamidad.(PR)