GUMIKAN sa nagpusot-pusot nilang mga anak, giingnan ni Divina ang iyang bana nga mag-family planning na sila. Kay tiaw mo bay, sud sa unom ka tuig nilang panagtipon ni Anton, nakatigom sad silag unom ka anak!

“Maayo ka man gong anayon, Day Divina. Kay og baboy pa, sa baktin lang daan ganansiya na ta. Pero kay tawo, perting problemaha!” nagkanayon si Anton human makahigop og init nga tinughong nga kaadlawon pang giandam ni Divina. Sayong mogikan si Anton sa iyang trabaho nga mao ang pag-drayeb og traysikad. Kini ang gibuhi niya sa nagtubo niyang pamilya.

“Unsa? Ako ra diay ingnon mong maayong anayon? Unya ikaw, maayo sab nga butakal?” ni Divina nga napikal.

Mingisi si Anton. Gipasiklapan niya ang nagkusmod nga simod sa iyang asawa. “Unya, unsa may atong himuon anang mag-family planning, Day?”

“Di ta una pun-an atong mga bata. Nia, paminaw, Anton,” miginhawag halawom si Divina. “Ikaw kay maoy una-unahon ug agresibo kaayo sa sulundong gimbuhaton sa magtiayon nga maoy hinungdan sa nag-alinupong tang mga anak, sukad karon maglain ka nag higdaanan. Anha ka na sa sala matug panahon sa kagabhion. Gawas lang kon Dominggo sa gabii.”

“Kay ngano diayg Sabado sa gabii, Day?”

“Dili maayo. Kay ang adlawng Sabado naay letrang ‘S’. Sama god anang Lunes, Martes, Miyerkules, Huwebes ug Biyernes.”

“Kay ngano diayg naay letrang ‘S’, Day Divina?” ni Anton nga misamot kahibung.

“Kanang letrang ‘S’ nag-presentar kana sa pung ‘sunod’ o ‘sundan.’ Unya ngita kag sundan na sad atong mga bata, nga naay atong kamanghuran di pa man gani kaantigo mokamang?” pangultima ni Divina.

Mipitok-pitok ang mga kalimutaw ni Antn nga wa kaayo makasabot ug makatugkad sa gipamung sa iyang asawa. Apan kanang sundan pa ang mga anak nila, maoy hagbay pa niyang gikabalak-an. Nahadlok siya nga mabuktot sa umaabot. Kay unsa may ibuhi ug ipadako niya sa mga bata nga pag-drayeb ra mag traysikad iyang kahinguhaan? Maong miuyon na lang siya sa gimbut-an ni Divina.

Apan ning milabay nga mga adlaw nausab ang panugkad ug panabot ni Anton. Nahunahunaan niya nga alkanse diay siya sa sumada sa gikasabutan nilani Divina. Kay ugod, may mga Dominggo sa gabii nga di siya makasud sa kuwarto sa iyang asawa, kay maatlan nga anaa ang ‘binulan nga bisita’ niini. Mireklamo siya. Buot niyang taplan kini og laing adlaw, bisag adlaw nga may letrang ‘S’. Apan gisinghagan lang siya ni Divina. Wa ‘ka-ek’ si Anton.

USA ka gabii niana, hilom nga misuong sa muskitero ni Divina si Anton. Labihang kurata ni Divina. “Hoy, Anton! Nganong nia ka nga Sabado man ron?”

“Di-dili, Day, uy...! Dili ron Sabado,” ni Anton nga mitutok sa nawalis nga daster sa asawa.

“Unsay dili? Sabado ron, Anton!” “Dili lagi! Abado ron. Abado...!” Ug kalit gisignit ni Anton ang asawa.Wa makaugpo si Divina. Unya nangahilom sila. (Katapusan)