MISYON. Ang tinuig nga medical mission sa Rotary Club Cebu South (RCCS) nakahatag og dakong tabang sa mga lumulopyo sa Barangay Libjo, Tabogon, Cebu, sama sa tambal ug bitamina sa mga bata ug sa mga edaran na. Niadtong Dominggo (Nob. 17), nitotal og 512 ka tawo, lakip ang mga bata, ang nahatagan og pagtagad sa ilang panglawas.
Dunay 130 ka mga hamtong ug edaran ug 165 ka mga bata ang nahatagan og tambal ug bitamina alang sa ilang panglawas samtang 95 ka tawo ang nahatagan sa libre nga antiyohos, 29 ang gipang-ibtan og ngipon, 93 ka bata ang natuli ug upat ang naoperahan sa cyst.
Dako kaayo ang pasalamat sa mga taga Libjo nga nakadawat sila og libre nga tambal ug bitamina ug sa uban pa nga libre nga serbisyo nga gipatigayon sa RCCS, nga gipangulohan karon ni Edward Bauzon. Kining tinuig nga medical mission giabagan usab sa Oriental Port and Services Corp. (Opascor) pinaagi ni Atty. Tomas Riveral, ang presidente sa Opascor, nga midonar sa mga tambal ug bitamina.
Malampuson ang medical mission niadtong Dominggo tungod usab ni Dr. Rey Baclig, nga usa sa mga haligi sa RCCS, nga maoy nagdala sa iyang team of doctors gikan sa Perpetual Succor hospital ug Velez hospital ug ingon man sa pundok sa mga dentista dinhi sa Sugbo.
Ang medical mission nga gipahigayon sa mga organisasyon sama sa Rotary usa ka pagtabang sa atong mga kabus nga kaigsoonan tungod kay sa kadako sa atong nasud dunay bahig sa atong katilingban nga dili dayon maabot sa serbisyo sa atong kagamhanan.
•••
DRUGAS. Bisan pa sa daghan na nga napatay tungod sa gipanghingusgan nga kampanya ni Presidente Duterte batok sa ilegal nga drugas, daghan gihapon ang namaligya ug mogamit sa shabu. Kinsay motuo nga sa Cebu City hall dunay 22 ka empleyado nga positibo sa shabu human sa gipatigayon nga drug test sa Cosap.
Kay kon si Presidente Duterte pa ang mayor, segurado nga tangtang na dayon sa trabaho ning 22 ka empleyado sa City Hall bisan kon wa pay confirmatory tests. Maayo gani kay si Cebu city Mayor Edgardo Labella gihatagan pa sila og higayon sa pagtubag sa imbestigasyon usa pahamtangan sa silot nga dismissal.
Gipaimbestigahin ni City Attorney Rey Gealon ang 22 ka empleyado aron sutaon nganong positibo sila sa shabu.
Gipakita ni Labella ang kaayo sa iyang panggamhanan. Apan, di ba angay ta mahibung nganong wa hinganli ning 22 ka empleyado sa City Hall nga nagtrabaho sa nagkalain-lain nga opisina nga positibo sa shabu nga unta ebidensya na man ang resulta sa drug test?
Gani, ang pagka ngan lang nga sila empleyado sa City Hall, angay na nga ipaila sila sa publiko ug tangtangon. Dako ba gyud ni sila og natabang sa City Hall tungod kay gipugngan pa man nga di sila matangtang sa trabaho?