GIPALAGPOT sa host Toledo City ang Aloguinsan, 93-74, sa ilang knockout match niadtong Sabado sa naghinapos nga Congressman PJ Garcia Cup basketball tournament nga gipahigayon sa Barba Sports Complex niadtong Sabado.
Sa kadaugan, ang Toledo City nga mitapos sa elimination round nga may 3-3 nga baraha maoy nakalabni sa ikaupat ug katapusang luna sa semifinals round nga ipahigayon karong Sabado sa Tuburan Sports Complex.
Sa sayo pa, ang Balamban yano usab nga mikuso-kuso sa Asturias, 102-86. Ang Balamban maoy naghupot sa ikaduhang puwesto.
Sa standings, nagtabla ang Balamban, Tuburan ug Barili nga pulos may 5-1 nga baraha, apan pinaagi sa quotient system, ang Tuburan maoy miguwa nga no. 1 team ug ikatulo ang Barili.
Sa cross-over knockout semis, ang Tuburan makigsangka sa Toledo City samtang ang Balamban mosakbang usab sa Barili diin ang modaog niini maoy mag-abot sa finals.
Sa volleyball event, dobling selebrasyon sa kadaugan ang nahimo sa Toledo City. Kini human nga ila usab nga gipalagpot ang Aloguinsan sa kulbahinam nga panag-engkuwentro, 2-1.
Ang Toledo mitapos sa elimination nga may 3-3 nga baraha kauban sa Pinamungajan. Apan pinaagi sa team-that-beats-the-other rule, ang Toledo maoy misakmit sa ikatulong luna samtang ikaupat ang Pinamungajan.
Una niini, gipildi sa Balamban ang Asturias, 2-1, aron haruson ang tanang duwa sa elims, 6-0, alang sa unang dapit. Ikaduha ang Tuburan (4-2).
Ikasangka sa Balamban sa semifinals round ang Pinamungajan, samtang magtakos usab ang Tuburan ug ang Toledo City. (JBM)