USA na lang ka daog ang gikinahanglan sa Southwestern University-Phinma aron hingpit na nilang maangkon ang three-peat sa Cebu Schools Athletic Foundation, Inc. (Cesafi) men’s volleyball tournament.
Kini human gipildi sa SWU ang University of San Carlos (USC) Warriors, 25-22, 25-19, 16-25, 25-21 sa Game One sa best-of-three finals sa USPF gym, Dominggo, Nobiyembre 17, 2019.
Saktong hinampakay nga nakahatag og kulbahinam sa duwa ang nasaksihan sa fourth set. Human sa panagtabla, 8-8, ang SWU mipahagsa og hamubong rally alang sa 12-8 nga labaw.
Nakabingat na unta sa ilang bintaha ang SWU apan nakasikit og balik ang USC, 24-21. Apan ang sipyat sa serbisyo sa USC maoy nag-abli sa pultahan sa SWU paingon sa kadaugan.
Upat ka mga players sa SWU-Phinma ang nakadawat og individual awards.
Kini mao sila si Manuel Canumay (best outside spiker), Nilo Jasmin (best middle blocker), Mark Kevin Petanao (best setter plum) ug Rafol Sico (best opposite hitter).
Samtang gipukan sa University of Southern Philippines Foundation (USPF) ang University of the Visayask, 25-20, 25-20 25-19, aron sakmiton ang third place honor sa men’s division. Midaog usab ang USC batok sa USPF sa women’s division, 21-25, 25-21, 14-25, 25-17, 15-11. (JBM, RSC)