MGA kanhi ug active players sa PBA ang gikatakdang mopakita og aksiyon sa dakbayan sa Danao alang sa usa ka goodwill game batok sa multi-titled University of the Visayas (UV) Green Lancers karong Sabado diha sa Danao Sports and Civic Center.
Ang mga kanhi PBA stars ng asila si John Ferriols, Willie Miller, Gary David, Lordy Tugade ug Sunday Salvacion makigkauban nila ni Paul Desiderio, Brian Heruela ug Mac Belo sa Blackwater Elite aron makigtigi sa Lancers, ang three-time straight champion sa Cebu Schools Athletic Foundation, Inc. (Cesafi).
Mo-reinforce usab kanila ang mga college mainstays nga sila si Jessie Aloro, JC Escalona ug John Jabonete.
Ang ticket mapalit lang sa tag P100 sa upper box, P200 sa lower box ug P250 sa VIP section.
Ang maong special match maoy modayandayan sa Chauncey Open Basketball League 2019 nga mosugod sa adlawng Dominggo, Nobiyembre 24 diha sa Mayor Panphil B. Frasco Sports Memorial Complex sa lungsod sa Liloan.
Sa press conference kagahapon sa Sunburst-Mango, si commissioner Tyrone Anthony Bayle mibutyag nga walo ka mga teams ang mikompirmar sa ilang partisipasyon sa tulo ka semana nga tournament.
Kini mao ang Kyrie Dave, ang runner-up sa bag-ong natapos nga Carcar City Mayor’s Cup, KCS, Bogo LGU, Fighter 50, San Remigio Properties, Good Harvest, Jie Espina ug Lapu-lapu Aguila.
Mokabat ngadto sa dul-an sa P200,000 nga premyo ang nakahan-ay alang sa mga mananaog.
Si Deputy commissioner Edsel Vallena, headcoach sa CIT-U Wildcats, nagkanayon nga ang mga participating teams bahinon ngadto sa duha ka bracket diin langkuban sa upat ka mga teams ang matag grupo.
Ang top two teams sa matag bracket maoy moabante alang sa cross over semifinals diin ang modaog maoy mag-abot sa finals.
Ang kampiyon mouli nga may P100,000 samtang ang second ug third placers makabulsa sa P50,000 ug P20,000.
Sa dugang detalyi, ang mga interested parties mahimong mobisita sa Chauncey Basketball League 2019 Facebook page. (JBM)