NAISYU na usab ning giingon nga police brutality sa Dakbayan sa Lapu-Lapu. Mikatap sa social media ang video sa giingong pagkulata sa pulis sa ilang gidakop nga mga lalake sa usa ka kalihukan.
Nagsulti man sa tinuod o wa ang kapulisan, bisan asa nga anggulo, alkanse sila kon pagtan-aw sa publiko ang hisgutan. Una, sila ang awtoridad nga gibansay sa pagtubag sa bisan unsa nga alarma. Bisan unsa nga sitwasyon, gipaabot nga sila kalma bisan unsa ka init ug ka tensyonado sa usa ka hitabo.
Ikaduha, naa na daan ang perception nga dunay mga pulis nga abusado sa katungdanan. Wa pa ni matangtang nga pagtuo ug pagtan-aw sa mga tawo labina sa way puas nga anti-drug campaign.
Tawo ra man tuod ang mga pulis apan, gibansay sila sa mga sitwasyon nga init apan, magpabiling kalma aron di mosamot kainit ang kahimtang.
Bisan pag kapila balikbalika nga dunay gikulata nga kauban nilang pulis ug hubog ang pipila ka mga sakop sa fraternity, di malaksi sa panumdoman sa publiko nga dunay gikulata ang mga pulis, kana kon ang basehan ang kuha sa video nga mikatap sa social media.
Unsaon man pagpasabot sa kapulisan nga di tinuod ang kuha sa video nga ilang gigukod ug gihasmagan ang tawo nga ilang gidakop? Ila pang nadapatan una pa napusasan.
Gilabay kuno sila og usa ka karton sa bottled water ug ilang kauban gikulata kuno. Igo na ba diay kadto nga katarungan nga ingon niadto pagdakop ang tawo nga naghimo sa ingon?
Sa init nga mga sitwasyon, kinahanglan unta sa mga pulis nga magpabiling kalma aron malikayan nga mosamot kainit ang sitwasyon. Bisan unsaon sa pagbali-bali ang estorya, dehado ang kapulisan kay di kadto ang paagi sa pagtubag sa alarma nga ilang girespondihan kay sa video, ang makita mao ra nga sila ang nangulata, way pulis nga nakulatahan.
Busa bisan unsaon, alkanse ang pulis.