NAGPADALA ang Department of Social Welfare and Development Field Office (DSWD) 7 uban sa Philippine Coast Guard District Central Visayas, og kapin sa 10 milyunes nga relief goods ngadto sa mga biktima sa linog sa Mindanao.
Kini naglakip sa 70,000 canned fish o sardines, 30,000 pcs. nga malong, ug 50 rolls sa 100-meter laminated sacks sa pagtabang sa mga pamilya na naigo sa linog sa Region 11 ug Region 12 diin ang tanan nibalor og P8.3 million.
Ang DSWD Visayas Disaster Resource Center nga nahimutang sa Mandaue City nakahatag usab og 1,000 ka karton sa sleeping kits nga nikantidad tanan og P2.3 million.
“We are sending these goods as a response to the immediate needs of the earthquake survivors,” matod ni Regional Director Rebecca Geamala sa DSWD 7.
Ang Philippine Coast Guard vessel nga MRRV 4406 maoy nagdala sa mga hinabang gikan sa Cebu Port niadtong Nobiyembre 2, 2019 ug niabot sa Cagayan de Oro City sa Nobiyembre 3.
Gikan sa Cagayan de Oro City, ang mga hinabang gidala sa Philippine Coast Guard nga sakyanan pinaagi sa land trip sa sentro sa rehiyon nga naigo sa linog. (PR)