NAKAGAWAS na sa tambalanan ang 16-anyos nga babaye nga labing una nga kaso sa E-cigarette o Vape-Associated Lung Injury (EVALI) sa nasod.
Ang babaye nga taga Sugbo hingpit na nga nakagawas gikan sa Mendero Medical Center sa lungsod sa Consolacion apan, padayon ang monitoring nga gihimo sa doktor niini ug sa Department of Health (DOH) 7.
Gibutyag ni DOH 7 Regional Director Dr. Jaime Bernadas nga wa sila mahibawo sa insidente tungod kay ang mismong doktor sa pasyente misuwat ngadto sa ilang ulohan nga buhatan, wa mopahibawo kanila.
Ang Disease Prevention and Control Bureau ang unang gipahibawo sa attending physician hinungdan nga unang nigawas ang taho sa national.
“There were initial findings that were submitted by the attending physician to Director Arevalo (Napoleon),” si Bernadas nagkanayon. Si Napoleon mao ang director sa DOH Disease Prevention and Control Bureau.
Dugang ni Bernadas nga gimanduan na sila sa DOH Central Office nga i-follow up ang pasyente. (HBL)