SA DI pa ang Pasko, makadawat na sa ilang cash gift gikan sa probinsya sa Sugbo ang barangay workers.
Kon kaniadto P1,500 ang madawat sa mga barangay tanod, karon makadawat na sila Og P3,000 nga cash gift nga direktang idunol sa Provincial Treasurer.
Samtang gikan sa P2,400 nga cash gift kaniadto, makadawat na og P4,000 ang mga Barangay Health Workers (BHW), Barangay Animal Health Aides (BAHA) ug uban pa karong Disyembre 18, 2019 atol sa ipahigayon nga assembly sa Minglanilla Sports Complex.
Gawas sa cash gift, makadawat usab og bag-ong uniporme ang mga BHW lakip na ang mga barangay tanod apan, gilaraw nga mahatag kini sa sunod tuig.
“As our way of saying thank you for these barangay front liners who are serving purely on a voluntary basis, wala ni silay sweldo unya makadawat man ni sila og honorarium gikan sa barangay, depende og unsay ma-afford sa barangay.So, some of them are receiving as little as P200 a month or P300 a month. Aron sad naa sila’y magasto para sa Pasko”, matod ni Garcia.
Dugang ni Garcia nga may madawat usab nga Noche Buena goodies ang tanang barangay workers alang sa pagsaulog sa Pasko.
Gipahinumdoman sa gobernador nga ang makadawat sa mga regalo mao katong naka serbisyo na sugod niadtong Disyembre 2018 sulod sa usa ka tuig.
Samtang kato usab mga gipanangtang nga dugay na nagserbisyo isip BHW ug nalakip sa lista sa Probinsya ug padayon nga nagserbisyo sa mga municipal health center o uban pang health units, lakip usab sa makadawat sa pahalipay. (ANV)