NAG-imbestigar ang Guadalupe Police Station 9 labot sa mireklamo sa ilang buhatan nga siya gitulis sa nagsakay og Honda CRV sa may Limkakeng street, Sityo Banawa, Barangay Guadalupe, Siyudad sa Sugbo niadtong Dominggo, alas 11 sa buntag, Nobiyembre 17.
Ang biktima nga nagpaila nga si Ren Engalla Deloso nagkanayon sa dihang nagpa blotter unta sa Guadalupe Police Station nga gikuha ang iyang P14,000 nga cash.
Lakip sa gikuha ang iyang ATM card nga naay sulod nga P3,500, duha ka ATM Gcash ug BDO.
Gikuha pa usab ang iyang pin code ug cellular phone.
Iyang gibutyag sa Facebook, diin iyang gipakita ang hulagway sa Honda CRV nga color pearl white nga way plate number tungod kay ang naka butang for registration pa.
Matod niya nga samtang nangihi siya sa dalan Limkakeng, kalit siya nga gihunongan sa maong sakyanan ug gipugos nga pagpasulod sa mga sakay.
Didto na siya sa sulod sa sakyanan giingong gitulis.
Sa luyo sa sakyanan, aduna kini sticker nga Roadstar nga apan, way conduction sticker nga mahimong ma-trace unta kon kinsa ang nakarehistro nga ngalan.
Tungod niini, si Police Captain Janelito Marquez, officer-in-charge sa Guadalupe Police Station, mohimo unag lawom nga imbestigasyon kon unsa ka tinuod ang pangangkon ni Deloso.
Usa sa ilang gidudahan labot sa post niini sa Facebook nganong naka picture pa siya nga unta gikuha man ang tanan niyang butang sama sa cellular phone.
Lakip sa ilang gikatingad-an kon nganong mangihi siya sa kilid sa karsada nga nianang mga orasa daghan kaayong sakyanan nga mangagi sa maong dapit.
“Imbestigahan pa kon tinuod ba gyud nig dili kay how come nga mangihi ka in a broad daylight nya didto ka mangihi sa luyo sa sakyanan?,” matod ni Marquez.
Gipasubay na ni Marquez ang mga kuha sa CCTV camera sa dapit aron masayran kon nagtug-an sa tinuod ang reklamante.
Lakip sa ilang adtuon ang Roadstar nga kompaniya kon maka may-ong ba sila sa sakyanan nga iyang gi post sa Facebook page nga gi share na usab sa daghang netizen.
Ang OIC sa Cebu City Police Office Police Colonel Geovanie Maines mimando na sa Guadalupe Police Station pag susi ug mohimong lawom nga imbestigasyon.