DILI pa makadagan ang 21 ka mga bag-ong garbage compactor truck sa Cebu City Government, usa ka semana human gi-turnover sa service provider ang maong mga ekipo gumikan sa kakuwang sa mga dokumento
Si Engr. June Maratas, pangulo sa Department of General Services (DGS), nibutyag nga wala pa silay nadawat nga Certificate of Registration (CR) ug Official Receipt (OR) gikan sa Hino Philippines nga maoy service provider.
Sa pagkakaron, ang 21 ka mga garbage truck anaa temporaryong giparada sa motor pool sa City Government nga nahimutang sa South Road Properties (SRP).
Dugang ni Maratas nga hangtod wala pa silay OR ug CR, ang maong mga brandnew compactor truck magpabilin didto sa ilang motor pool sanglit wala pa kini pagtugot gikan sa Land Transportation Office (LTO) kansang obligasyon pagkuha sa CR ug OR iya sa service provider.
Ang pangulo sa DGS nihimo na og komunikasyon ngadto sa Hino Philippines para makuha na ang CR ug OR diin matod pa ni Maratas nga posible sa Manila girehistro ang maong mga sakyanan sanglit ang Central Office sa Hino ang nidaog nga service provider.
Si Mayor Edgardo Labella nagkanayon wala nay rason ang DGS nga gipangulohan ni Engr. Joel Biton nga dili makuha ang basura gikan sa mga barangay sanglit sa kinatibuk-an, moabot na og 32 ka garbage trucks sa higayon nga makadagan na ang bag-ong gipaplit sa siyudad nga gigahinan og P232 milyones sa administrasyon ni kanhi Mayor Tomas Osmeña. (PAC)