GIPATAAS na ang ang-ang sa serbisyo sa Cebu South Bus Terminal (CSBT) nga susama na sa terminal sa sistema sa airport.
Kini pagpaningkamot nga masolusyonan ang nadawat nga reklamo sa mga pasahero kabahin sa kahuot nga sitwasyon sa CSBT ilabi na sa weekend ug peak seasons, mo-isyu na og boarding passes ang bus liners sa mga pasahero aron makasulod kini dayon ug makalingkod.
Ang maong pamaagi gi-propose sa mga opisyal sa bus liners atol sa ilang pagtagbo ug giaprubahan sa Gobernador gahapon, Lunes, Nobiyembre 18, 2019.
Niadtong Sabado, Nobyembre 16, 2019 usa ka netizen ang mikuha ug video sa sitwasyon sa terminal samtang naghuwat kini ug masakyan.
Reklamo sa netizens ang huot ug hinay nga pag isyu sa tickets diin gibasol ang “No Ticket, No Entry” nga sistema niadtong Kalag-kalag.
Wa musopak si Garcia sa gihimong komento ug reaksyon sa mga pasahero tungod sa ilang nasinati, apan mihangyo kini sa mga nangulo sa CSBT nga dili na muhowat ug kamandoan gikan sa Gobernador una mohimo ug mga solusyon.
Matod ni Garcia nga pinaagi sa boarding pass makatabang kini nga maluagluagan ang sitwasyon sa gawas nga bahin sa dan N. Bacalso ilabi na sa entrance.
“As the need arises inyo nanang i-implement mo-issue namo ana ug boarding pass katong dili pa ma-issuehan ug ticket unya pasudlon na aron makahuwat na didto maayong makalingkod sa sulod sa waiting area anha na isyuhan og ticket,” madtod ni Garcia.
Dugang niya nga kon mao man gani dili gihapon epektibo ang paghatag ug boarding pass kinahanglang mangita ug laing paagi ang mga opisyal sa CSBT pagpangita ug solusyon.
Gilaraw usab sa gobernador ang pagpamutang og Ticket Center diha sa gihimong drug testing area ug matod ni Garcia, iya na nga gihangyo ang Engineering office nga mosusi ug modisenyo sa himuong ticketing counters.
“I saw nga sa entrance man gud dunay nag-occupy nga murag laboratory ug naa pay coop didto, katro nga space perfect unta to nga mabutangan ug ticket counters na left and right aron magtapad-tapad na didto sama sa eroplano ba,” matod ni Garcia.
Gilaoman nga kutob na lang sa uwahing adlaw sa Nobyembre ang kasamtangang migamit sa lugar. (ANV)