GIDUNGGAB sa anak nga lalake ang iyang inahan kaduha sa buko-buko niadtong Dominggo sa hapon, Nobiyembre 17, 2019.
Ang suspek giila nga si Racky Bacang, 27, taga Purok 6, Barangay Cubacub, Mandaue City.
Matod sa kapulisan nga nakadawat sila og report sa hitabo gikan sa usa ka habal-habal driver nga anaa ra sab sa lugar.
Ilang naabtan si Racky nga nagkupot gihapon sa usa ka butterfly knife nga may gistas-ong 11 inches samtang si Judith Bacang, inahan, samdan.
Gihangyo sa kapulisan si Racky sa pagbutang sa iyang hinagiban apan, wa mopatuo ug nihamag pa kang Staff Sergeant Jodelmar Pones. Nibunot sa iyang armas si Pones ug gipusil sa wala nga tuhod si Racky aron di na makalihok.
Si P/SMS Gary Velasquez, usa sa miresponde nga pulis, niingon nga ang mga paryente sa suspek miingon nga si Racky tiggamitan og drugas. Nadakpan na kini sa kapulisan sa miaging tuig tungod sa drugas. (KFD)