NAGTUO ang mga residente nga nasuko ang agta hinungdan nga nawad-an og tubig sa ilang barangay sulod sa pipila na ka semana diha sa Barangay Mambuaya ning siyudad sa Cagayan de Oro.
Niadtong Nobyimbre 15 pinaagi na usab sa albularyo nga si Joan Velez nagpahigayon og ritwal ang mga residente nga nituo nga dunay agta ug dili ingon nato ang hinungdan sa pagkawala sa tubig.
"Pagbutang sa insenso, nitaas kaayo ang kalayo, abi gani namo masunog na mi nakita namo ang isog kaayo nga kalayo, itom ang iyang aso ingon ang albularyo nga nasuko sila kay atong gipapahawa, pagkagamay na ang aso kalma na ingon ang albularyo nga nisugot ra sila," pahayag sa residente.
Sa pakighinabi kang Perla (dili tinuod nga ngalan), 62 ug residente sa maong dapit gibutyag nga dako ang ilang pagtoo nga rason sa pagkawala sa ilang tubig mao ang mga dili ingon nato.
"Kay nasuko sila sa mga tawo gyud kay ang residente diha nasuko tong agta, kay nganong gibaligya tong tubig didto sa taga gawas, kana kunong tubig di kuno na angay idalo kay that is life," matud ni Perla.
Nasayran nga nag-amot amot ang mga residente og tag P20 ug ang uban P100 lakip na sa Barangay Tsirman nihatag og P500 aron nga makapalit og baboy aron ihalad atol sa ritwal ug nagtoo nga maayo na ang ilang tubig human makapangayo og pasaylo.
"Ma okay na na, nagpasalamat mi, nangayo nami og sorry sa ila, nag tagsa-tagsa mi adto sa deep well, ang taga gawas gyud nasuko gyud sa amo kay dalo kuno mi og tubig," dugang pa.
Nagpasalig usab sila nga kung moagas na maghatag na sila og tubig sa silingang barangay apan gipasabot nga gani kulang sab alang kanila ang tubig sa maong dapit apan andam na sila makigbahin.
Dako ang ilang pagtoo nga duna gyu'y nagbantay sa ilang tinubdan sa tubig gani daghan ang giingong nakakita niining maong agta ug gani wala usab sila namugos sa mga dili motoo.
Samtang una na nga gibutyag ni City Administrator Teodoro Sabugaa nga tungod sa sunod-sunod nga pagtay-og rason nga nawala ang tubig sa maong dapit ug gani nag-suplay ang siyudad pinaagi sa City Disaster Risk Reduction and Managment Office (CDRRMO).
"Naay feedback nga katong ilang source sa water nila probably naapektohan sa linog.
Mao tong nanginahanglan sila og support para sa tubig. Mao na atong CDR gapaningkamot nga maka-supply," matud ni Sabuga-a.
Karong panahona kasamtangang gipaayo na sa water provider ang maong tinubdan sa tubig.