PIPILA ka adlaw nga gisuspenso ang trabaho sa Courts of Appeals human namatikdan ang mga pagliki sa buhatan ng nahimutang sa YMCA building sa Julio-Pacana street, ning siyudad sa Cagayan de Oro.
Nakitang dunay dakong pagliki sa ikatulo ug ikaupat nga andana ug dili na luwas ang buhatan human sa mga pagtay-og niadtong niaging bulan.
Gibutyag ni Acting City Administrator nga si Teodoro Sabuga-a, nga nidangop sa ilang buhatan ang tinugyanan sa CA aron usab sa paghangyo og espasyo.
"Nag-anhi man gani to dinhi kay they wanted to request an office mura bag space ba so nangita lang mi kay wala mi lain nga lugar nga mahatag namo gawas sa kanang sa may bridge ba I do not know kung dayunon ba sab nila," matud ni Sabugaa.
Samtang una na usab nga gibutyag ni Engr. Rolando Pacuribot sa City Engineers Office nga delekado gyud ang maong gambalay ug gani kung mahimo dili na kini gamiton hangtod nga mapa-repair ang mga liki.
Gikumpirma usab kini sa tinugyanan sa CA ug gani nagkauyon nga i-suspenso una ang trabaho alang usab sa ilang kaluwasan lakip na sa mga kliyente.
Naghangyo usab sila sa Supreme Court nga aron makapadayon sa ilang mga trabaho ug maserbisyohan ang katawhan nga mahatagan og pundo aron nga makabalhin.
"In view thereof, the Justices of the CA's Mindanao Station unanimously agreed to suspend work in order to ensure the safety and well-being of its officials, personnel, and litigants. In order to prevent a prolonged disruption of the Mindanao Station's functions, it is imperative to secure an adequate office space in Cagayan de Oro City," sa pahayag sa maong gipadala nga sulat ngadto kay Chief Justice Hon. Diosdado Peralta.
Naghangyo sila nga masuportahan diha sa ilang pagbalhin sama sa panginahanglanon sa ibayad sa renta matag bulan nga anaa sa P2,212,500.00 ngadto P2,300,000.00 sa duha ka mga pribadong opisina; kantidad nga anaa sa P27,491 737.93 aron sa pagpaayo sa posibleng maabangan; mga kagamitan sa ilang buhatan nga gibanabanang anaa sa P20,055,000.00 ug pagkonsidera sa maong hangyo nga dili na i-agi pa sa bidding, procurement ug audiling tungod sa dinalian nga panginahanglanon.
Karong panahona nagpaabot pa sila sa tubag sa supreme court ug nagpulipuli lamang aron nga padayon nga maserbisyohan ang mga indibidwal nga nagkinahanglan kanila.