PATAY ang usa ka senior citizen nga igo lang mang-hunting og mananap dihang gipusil niadtong adlawng Sabado, Nobiyembre 16, pasado alas 12:30 sa udto sa Barangay Halapian, San Fernando, Bukidnon.
Giila ang biktima nga mao si Tagalog Maganyo, 65, minyo, residente sa susamang dapit.
Sa inisyal nga imbestigasyon sa San Fernando Police Station nasuta gikan sa asawa sa biktina nga si Tely nga nang-hunting lamang og mga ihalas nga mga mananap dihang nadungog sa asawa ang sunod sunod nga buto.
Tungod niini ilang giadtoan ang lugar ug maoy ilang naabtan ang biktima nga nagbuy-od ug naligo sa kaugalingon nga dugo ug wala nay kinabuhi.
Nagtoo ang pamilya sa biktima nga hinimoan sa sakop sa New People’s Army ang nihimo sa ingon ngadto kang Tagalog tungod kay hugtanon niining gikondenar ang maong grupo ug mosupak kanila.
Hinoun ang kapulisan padayon pa sa pagsuta ug imbestigar sa lain pa nga posibilidad sa pagpatay niini.