4 nangulata sa pulis, priso

DETINADO ang upat ka mga lalaki human namun-og pulis sa National Highway Purok 6, Brgy. Kiwalan, Iligan City.

Sa interbyu sa Sun.Star Superbalita kang Police Major James Daleon, Chief sa Iligan City Police Station 3 gibutyag niini nga nagpatuman lamang og curfew si Police Staff Sergeant Allan Amancio.

Aminado kini nga wala gyod naka uniporme si Amancio apan nagpaila kining pulis ngadto sa upat ka mga lalaki nga mao sila si Chris Rome Villaneda, 25; Bernard Chua, 28; Ryan Chua Sarinogon 27 ug Erickson Nabong, 25.

"Maka uniporme ug dili atong mga polis naka-duty kana sila kay on call kanunay. Kita diri sa Iligan gapatuman kita og curfew gikan sa alas 10:00 ngadto sa mga minor ug alas 12:00 sa mga adult. Kabalo sila ana nga ordinansa," matud ni Daleon.

Dugang niini nga naka-inom ang mga suspek ug dihang gisita ni Amancio nasuko og maayo ug gitabangan og suntok.

"Nalipay nalang pod ko sa atong personnel nga wala gyod siya niresbak kay kung iyang gihulbot sab iyang pistola sigurado man gyod nga mapusilan kini sila," dugang niini.

Nadakpan kining mga suspetsado dihang mi-reenforce ang kapulisan sa Station 3 samtang si Amancio gidala sa ospital.

Nakagawas na sa tambalanan si Amancio kinsa mihikay na sa kasong direct assault batok sa mga suspetsado.