GIPAYUKBO sa Jose Maria College (JMC) Kings ang Asian International School of Aeronautics and Technology (Aisat), 106-71, sa Davao City Recreation Center (DCRC) niadtong Dominggo, Nobyembre 17, aron nga angkunon ang ilang ikalima nga sunod-sunod nga kadaugan sa 2019 Collegiate Sponsors League (CSL) Escandor Cup.
Si John Hebaina maoy nangulo alang sa Kings pinaagi sa pagpabuhayag og 16 puntos uban sa tulo ka rebounds, tulo ka assists ug usa ka palak.
“Pasalamat ko sa akong mga teammates, naningkamot mi i-execute ang plays,” matud ni Hebaina pinaagi sa CSL Escandor Cup Facebook page.
Nagpabilin ang Kings sa unang puwesto sa bracket B team standings uban sa way mansa nga 5-0 win-loss card sa liga nga gipasiugdahan sa Samahang Basketbol ng Pilipinas (SBP) regional director Glenn Escandor isip qualifying event alang sa Philippine Collegiate Champions League (PCCL) Mindanao Finals.
Ang Aisat, sa iyang bahin, naggunit og kartada nga 2-3.
Samtang ang University if Mindanao (UM) Davao Wildcats, giangkon ang ilang ikaupat nga kadaugan human sa unom ka mga duwa sa bracket A pinaagi sa paglubong sa Agro-Industrial Foundation College of Southeastern Philippines (AIFC) Sailors, 89-82.
Si Wildcat Karlo Quidlat nikamada og 22 puntos uban ang lima ka rebounds ug duha ka steals.
Sa laing duwa, ang Holy Cross of Davao College (HCDC) Crusaders giyabo ang Cor Jesu College of Digos, 91-75, luyo sa mabayanihon nga best player of the game nga si Paul Turco (12 puntos, 13 rebounds, tulo assists, usa ka steal ug pito ka mga palak).
Mga duwa mobalik sa Biyernes.