SIGNIT sa Toril Police Station, uban sa Criminal Investigation and Detection Group (CIDG) Davao City Field Unit, ang usa ka lalaki kinsa giingong nangilad ug nagpaila nga abogado alang sa deborsyo.
Alas 8:45 Lunes sa buntag, Nobyembre 18, gisikop ang suspek nga si Juvern Reyes Garcia, hamtong ang pangedaron didto sa gipuy-an niini sa Kunisawa Apartment, Durian St., So. San Roque, Daliao, Davao City.
Niaksiyon ang CIDG-Davao City Filed Unit, ubos sa superbisyon ni Police Major Milgrace Cajes Driz, hepe sa DCFU, kauban sa Toril PNP hinungdan nga malampusong nasikop ang suspek atol sa entrapment operation.
Sa imbestigasyon, migula nga gidawat sa suspek ang marked money gikan sa biktima nga si Juvy (bansagon gitago) diin ang maong salapi giingong bayad sa proseso sa petition for recognition foreign of judgment sa divorce tali sa biktima ug sa kanhi kapuyo niini.
Ang suspek gisikop human nagpaila nga abogado ug giingong usa sab siya ka certified public accountant.
Atol sa pagdakop sa suspek, nakuhaan sab siya og mga drug paraphernalia sa gipuy-an mismo niini.
Laing nakuha gikan sa posisyon sa dinakpan ang marked money nga P42 mil ug usa ka peke nga Professional Regulation Commission ID.
Gidala ang suspek sa CIDG-Davao ug gilayon siyang gi-turnover sa Toril PNP aron mapasakaan og reklamo. (Jeepy P. Compio)