MAKILALA, Davao del Sur -- Gipasilip na sa National Housing Authority (NHA) ang model house nga ipatukod alang sa mga biktima sa linog niining lungsod.
Ang maong balay usa ka energy panel structure o sandwich panel nga gahinan og badyet sa NHA.
Sumala ni Myungsooperk, usa ka Koreano nga nagpatukod sa model house, nga ang maong balay ginama sa bakal ug adunay 5 X 5.1 meters ang gidak-on.
Sa sud sa balay, adunay usa ka lawak nga mahimong katulgan, kusina ug kasilyas.
Mobalor sa P150,000 ang kantidad sa balay nga mahimong kapasilungan sa usa ka pamilya.
Nasayran nga 357 ka mga pamilya ang mibakwit gikan sa Barangay Buena Vida sa lugar human grabeng naapektuhan sa linog ang dapit.
Halos tanang kabalayan nahugmak atol sa kusog nga linog niadtong Oktubre 31.
Makita sab ang daghang liki ug landslide sa kadalanan human gituhoang giagian sa fault line.
Gideklara na sa kagamhanang probinsiyal nga “no build zone” na ang maong barangay human sa nahitabo.
Lakip sa nahugmak ang mga tunghaan sa elementarya ug sekondarya, barangay hall ug mga vital structures.
Sa kasamtangan, apil nga gigamit isip evacuation center sa mga pamilyang nawad-an og balay mao ang kampo sa Boy Scout of the Philippines sa Brgy. Bulatucan. (Orlando B. Dinoy)