1 patay, 9 angol sa 2 ka aksidente

(SunStar foto/ Benjie B. Talisic)
(SunStar foto/ Benjie B. Talisic)

USA ang patay samtang siyam ang nangaangol sa managlahing mga aksidente sa Metro Cebu sa Martes, Nobiyembre 19, 2019.

Usa ang patay samtang unom ang angol lakip ang driver sa pagkabangga sa kahoy sa usa ka multicab nga gisakyan sa mga empleyado sa usa ka call center alas 2:30 sa kaadlawon sa Transcentral Highway, Upper Garahe, Barangay Busay, Siyudad sa Sugbo.

Patay diha-diha si Roy Vincent Talamor, 31, nagtrabaho sa Sykes Well, Panagdait, Kasambagan, Cebu City.

Si Talamor nakaangkon og dakong kadaot sa iyang lawas.

Naa usab sa talandugon nga kahimtang ang driver sa Suzuki multicab with canopy pick up type (YJP 590) nga si Dashiell Medina Antipuesto, 25, taga sa Sto. Nino St., Barangay Hipodromo, Siyudad sa Sugbo.

Ang mga nangaangol mao silang Apple Del Monte Nangca, 24, taga General Maxilom Avenue, Barangay Carreta; Dale Angelo Ando Pantirople, 24, taga Carreta; Jane Francis Antiporta Rosell, 27, taga Greenside, Hipodromo; Ferliz Mae Borja Fajardo, 23, taga Tukuran Zamboanga del Sur; ug Carla Louise Decena Songalia, 23, taga Kapatagan, Lanao del Norte.

Matod ni P/Maj. Dindo Alaras, hepe sa Mabolo Police Station, nga sigun sa ilang imbestigasyon, gikan sa Tops sa Barangay Busay, ang grupo giingong nag-inom.

Sa pagpamauli, kusog nga nakapadagan si Antipuesto ug sa pag-abot sa kurbadahon nga dalan sa Upper Garahe, na-overshoot ang multicab.

Nidiretso kini sa kanal sa kilid sa karsada ug kusog nga nabangga sa punoan sa kahoy.

Dali nga nanawag og ambulansya ang mga residente sa dapit.

Gipangdala sila sa Perpetual Soccuor ug Chong Hua Hospital.

Si Antipuesto naipit sa manobela ug nakuha sa rescue team.Sa nakuha nga kasayuran sa Mabolo police station nga niadtong Lunes sa gabii, Nobiyembre 18, nag-inom pa ang grupo sa wa pa sila mosaka sa Tops.

“Nag-inom na kuno to daan diri sa ubos unya nisaka pa silag Tops aron mag-inom. Basta naka inom na sila. Most likely kon nakaabot nag 2:30 a.m., daghan na gyud nag nainom. Matod pa ingon tong usa ka kauban paspas na kaayo ang dagan nya giingnan nga pahinay-hinayan nalang nya wala man mamati,” matod ni Alaras.

Nakita sa mga imbestigador nga adunay tulubagon ang driver sa multicab tungod kay nakainom.

Bisan kon apil siya nga naangol, ipaubos nila kini sa hospital arrest.

Kon maayo na sa iyang kadaot sa lawas si Antipuesto, mag-atubang kini og reckless imprudence resulting in damage to property, multiple physical injuries and homicide.

Dumbol sa CSCR

Tulo ang angol sa dumbol sa duha ka mga sakyanan sa may Cebu South Coastal Road sa habig sa Barangay Tangke, Dakbayan sa Talisay, unahan sa Talisay City Fish Port.

Usa ka multicab nga kolorum nga namasahero nadumbolan sa van nga nagsunod niini, alas 7:30 sa buntag.

Matod ni Jonathan Tumulak, pangulo sa City of Talisay Traffic Operations and Development Authority (CT-TODA), nga ang duha ka mga sakyanan parehong nagsubay og sama nga lane gikan sa Dakbayan sa Sugbo, padung sa syudad sa Talisay.

Ang multicab ang gimaneho ni Virgelio Zambrano Jr., 58, lumolupyo sa Barangay Bulacao, Siyudad sa Sugbo.

Niangkon si Zambrano nga nang-pick up siya og pasahero sa Plaza Independencia sa dakbayan sa Sugbo ug ihatud sa Talisay City.

Giangkon usab niya nga kolurom kini kun walay prangkisa sa pagpamasahero.

Aduna kini napulo ka mga pasahero. Usa sa mga pasahero nipara aron manaug sa lugar nga nadisgrasyahan.

Giingon nga nihunong ang multicab ug nibangga ang van nga gimaneho ni Edgar Martinez Alic, 26, residente sa Lawaan I, Dakbayan sa Talisay.

Tungod sa impact, ang tulo sa 10 ka mga sakay sa multicab naangol. Mga angol giila sila nga sila si Brian Ariola Red, 35; Ayline Tagalog, 43; ug Teddy Dela Cerna, 50.

“Pareho going to south, ang mga involved, usa ka multicab nga kolurom ug usa ka private nga van. Niangkon ang driver nga gikan siya nang pick up og pasahero. While nagdagan siya, dihay nituktok, ni-menor siya sa iyang pagpadagan pero nagsunod niya, kusog nga nagdagan ang van. Hinungdan nga nadumbulan siya sa maong van,” asoy ni Tumulak.

Ang tulo dali nga gidala sa Talisay District hospital, samtang ang mga driver sa duha ka mga sakyanan gidala sa Lawaan 1 police community precinct.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph